Индонезияда Ява теңізінде жолаушылар кемесі аударылып, 129 адам із-түзсіз жоғалды. Құтқарушылардың жұмысына теңіздегі қолайсыз ауа райы мен биіктігі үш метрге дейін жеткен толқындар кедергі келтіріп жатыр, деп хабарлайды ult.kz.
Оқиға кезінде Virgo Transport 8 кемесінің бортында 243 адам болған. Кеме Шығыс Явадағы Сурабая қаласынан Оңтүстік Калимантанда орналасқан Банджармасинге қарай бет алған.
Апаттан кейін 108 адам құтқарылған. Сонымен қатар алты адамның қаза болғаны ресми түрде расталды.
Қазіргі таңда жоғалған жолаушыларды іздеуге кемінде 622 құтқарушы тартылған. Операцияға 17 кеме, бес тікұшақ және ұшақтар да қатысып жатыр. Алайда қатты жел мен биік толқындар аударылған кемеге жақындауды қиындатып отыр.
Құтқару қызметінің мәліметінше, апат кезінде теңіздегі ауа райы күрт өзгерген. Үш метрге дейін жеткен толқын кеменің оң жақ бортына соғылып, нәтижесінде кеме бір бүйіріне қатты қисайып, кейін аударылған.
Индонезияның көлік министрі Дуди Пурвагандхидің айтуынша, кеменің сыйымдылығы 500 жолаушыға дейін есептелген. Сондықтан министр апатқа борттағы адам санының шамадан тыс көп болуы себеп болды деген болжамды жоққа шығарды.
Қазір 129 адамды іздеу-құтқару операциясы жалғасып жатыр.
