Indoneziiada Iava teńizinde jolaýshylar kemesi aýdarylyp, 129 adam iz-túzsiz joǵaldy. Qutqarýshylardyń jumysyna teńizdegi qolaisyz aýa raiy men biiktigi úsh metrge deiin jetken tolqyndar kedergi keltirip jatyr, dep habarlaidy ult.kz.
Oqiǵa kezinde Virgo Transport 8 kemesiniń bortynda 243 adam bolǵan. Keme Shyǵys Iavadaǵy Sýrabaia qalasynan Ońtústik Kalimantanda ornalasqan Bandjarmasinge qarai bet alǵan.
Apattan keiin 108 adam qutqarylǵan. Sonymen qatar alty adamnyń qaza bolǵany resmi túrde rastaldy.
Qazirgi tańda joǵalǵan jolaýshylardy izdeýge keminde 622 qutqarýshy tartylǵan. Operatsiiaǵa 17 keme, bes tikushaq jáne ushaqtar da qatysyp jatyr. Alaida qatty jel men biik tolqyndar aýdarylǵan kemege jaqyndaýdy qiyndatyp otyr.
Qutqarý qyzmetiniń málimetinshe, apat kezinde teńizdegi aýa raiy kúrt ózgergen. Úsh metrge deiin jetken tolqyn kemeniń oń jaq bortyna soǵylyp, nátijesinde keme bir búiirine qatty qisaiyp, keiin aýdarylǵan.
Indoneziianyń kólik ministri Dýdi Pýrvagandhidiń aitýynsha, kemeniń syiymdylyǵy 500 jolaýshyǵa deiin eseptelgen. Sondyqtan ministr apatqa borttaǵy adam sanynyń shamadan tys kóp bolýy sebep boldy degen boljamdy joqqa shyǵardy.
Qazir 129 adamdy izdeý-qutqarý operatsiiasy jalǵasyp jatyr.
