Kópshilik súiip tyńdaityn án oryndaýshynyń ózine de únemi qýanysh syilai bermeidi. Biri qaita-qaita aitýdan jalyqsa, endi birine sol týyndy jaqynyn esine túsiredi. Qazaqstandyq ónerpazdardyń suhbattary men olar týraly jariialanymdardan kei ándi oryndaýǵa nege qulyqsyz bolǵany belgili boldy, dep habarlaidy ult.kz.

Skriptonit: hitterin oryndaýdan mezi bolǵan

Skriptonittiń tyńdarmanǵa tanymal ánderiniń qatarynda “Eto liýbov” pen “Tantsýi sama” bar. Alaida mýzykanttyń ózi kezinde osy týyndylaryn oryndaýdan jalyqqanyn aitqan.

StarHit basylymy keltirgen 2017 jylǵy pikirinde ol atalǵan ánderdiń ózin titirkendiretinin jetkizgen. Sondai-aq sol kezde “Kosmos” týyndysyn birneshe kontsert boiy oryndamaǵanyn aitqan. Bul — mýzykanttyń sol kezeńdegi kózqarasy. 

Aiqyn: “Pah-pah” týraly ne jazylǵan?

Aiqyn Tólepbergenniń “Pah-pah” áni de kópshilikke jaqsy tanys. 1show.kz saityndaǵy burynǵy jariialanymda bul ánniń oryndaýshynyń ózine de jalyqtyrǵany jazylǵan.

Degenmen materialda ánshiniń osyǵan qatysty tikelei sózi keltirilmeidi. Sondyqtan bul málimetke súienip, Aiqyn týyndyny repertýarynan alyp tastady nemese qazir oryndamaidy dep aitýǵa bolmaidy.

Maqpal Júnisova: jubaiyn eske salatyn án

Maqpal Júnisovanyń “Bir bolaiyq, nurlanaiyq” ánin aitqysy kelmeýiniń sebebi bólek. Bul týyndyny Seidolla Báiterekov Zamanbek Nurqadilov pen Maqpal Júnisovaǵa arnaiy jazǵan, sóziniń avtory — Ábdirahman Asylbek.

2025 jylǵy aqpanda ánshi jeke paraqshasynda burynǵy baǵdarlamadan úzindi bólisken. Oqyrmandary ándi nege oryndamai júrgenin suraǵanda: “Zákeń bar kezde aittym. Ol joq kezde aitqym kelmeidi”, — dep jaýap bergen.

Toqtar Serikov: daýdan keiin ánin aitýdy toqtatqan

Toqtar Serikov “Aýylǵa baramyn” ánin oryndaýdan nege bas tartqanyn 2024 jyly “Áigerim Seifollanyń syrlasýy” baǵdarlamasynda túsindirgen.

Ánshiniń aitýynsha, týyndysy shyqqannan keiin jerles sazger onyń óz ánine uqsaitynyn aityp, daý týǵan. Toqtar Serikov álgi shyǵarmany buryn tyńdamaǵanyn jetkizgenimen, keiin sazgermen sóilesip, máseleni sheshken.

“Sen aita ǵoi, seniń ániń bolsyn. Men bul ándi aitýdy toqtatamyn”, — degen ánshi sol áńgimeden keiin týyndyny oryndamaǵanyn aitqan.