Ánshi Medeý Arynbaev marqum jubaiy Aigúlge bergen ýádesi men nelikten qaita úilenbegeni týraly aitty, dep habarlaidy ult.kz.

Óner iesiniń sózinshe, ol Aigúldi alǵash kezdestirgende-aq bolashaq jary ekenin sezgen. Jubaiy ómirden erte ótken soń, eki balasyn ózi tárbielep ósirgen.

Ánshiniń jadynda jarynyń sońǵy sátteri áli saqtaýly. Aigúldiń ózine uzaq qarap, kúlimsiregenin ol balalaryn amanattaǵandai qabyldaǵanyn jetkizdi.

Jaqyndary ánshige qaita shańyraq kóterýge keńes bergen. Alǵashynda mundai áńgimeler kóńiline tigenimen, keiin ázilmen jaýap berýdi ádetke ainaldyrǵan.

“Men eki ret úilenip, ajyrasqan adammyn ǵoi”, – dep qaljyńdaitynyn aitqan Medeý Arynbaev. Iaǵni bul sóz ánshiniń eki ret nekege turǵanyn bildirmeidi, qaita úilený týraly suraqtarǵa ázildep bergen jaýaby eken.

Óner iesi Aigúlge bergen ýádesinde turǵanyn atap ótti. Onyń túsiniginde, mahabbattyń tiregi – senim. Eki adam bir-birine sengende ǵana sezimin saqtap qala alady dep esepteidi. Jaryna degen yqylasy jyldar ótse de báseńdemegenin aitqan ánshi úshin ýádege beriktik pen adaldyqtyń orny bólek.

Aita keteiik, Oljas Abai Rústem Janyamanov týraly pikir bildirdi. 

Medeý Arynbaev kim?

Medeý Ýálihanuly Arynbaev – ánshi, kompozitor, Qazaqstannyń eńbek sińirgen qairatkeri. Ol 1967 jyly 5 naýryzda qazirgi Túrkistan oblysy Saryaǵash aýdanynyń Darbaza aýylynda dúniege kelgen. Qazaq estradasynda ózindik oryndaý mánerimen, lirikalyq ánderimen tanylǵan.

Óner iesi 1997 jyly qurylǵan “ABK” triosynyń quramynda Qydyráli Bolmanov jáne Erlan Kókeevpen birge án shyrqaǵan. Keiin jeke shyǵarmashylyǵyn jalǵastyryp, tyńdarmanǵa “Bári esimde” sekildi ánderimen tanyldy. Repertýarynda Nurǵisa Tilendiev pen Shámshi Qaldaiaqovtyń týyndylary da bar.

Ánshiniń “Ótken jyldar marjandary” jáne “Arnadym ánimdi” atty albomdary jaryq kórgen. Ol 2002 jyly “Altyn adam” ulttyq syilyǵyn ielenip, 2015 jyly “Qazaqstannyń eńbek sińirgen qairatkeri” ataǵyn alǵan.