Qazaqstan prezidenti Qasym-Jomart Toqaev pen ánshi Dimash Qudaibergen 2027 jylǵy The Muslim 500 tizimine engizildi, dep habarlaidy ult.kz.

Reitingti Iordaniia astanasy Ammandaǵy Koroldik islam strategiialyq zertteýler ortalyǵy ázirlegen. Toqaev “Saiasat”, al Dimash “Óner jáne mádeniet” sanatynda atalǵan.

Tizimdegi alǵashqy 50 tulǵaǵa naqty oryn berilgen. Qalǵan qatysýshylar qyzmet salasyna qarai toptastyrylǵan. Olardyń arasynda din ókilderi, saiasatkerler, ǵalymdar, kásipkerler, sportshylar men óner adamdary bar.

Portaldyń jazýynsha, biyl birinshi oryndy bes adam bólisken. Olar – Saýd Arabiiasynyń koroli Salman ibn Abdýlaziz, taq murageri Muhammed ibn Salman, Pákistan premer-ministri Shehbaz Sharif, feldmarshal Asim Mýnir jáne Túrkiia prezidenti Rejep Taiip Erdoǵan. Sondai-aq alǵashqy bestikte Modjtaba Hamenei men Iordaniia koroli Abdalla II atalǵan.

Ortalyq Aziia elderiniń basshylary arasynda Ózbekstan prezidenti Shavkat Mirziioev eń joǵary orynǵa kóterilgen. Ol 40-orynǵa turaqtap, alǵash ret úzdik elýlikke kirgen.

Tizimge Ázerbaijan prezidenti Ilham Áliev, Sheshenstan basshysy Ramzan Qadyrov jáne sportshy Habib Nurmaǵomedov te engen. Nurmaǵomedovke arnaiy qurmet belgisi berilgeni aitylǵan.

The Muslim 500 reitingi 2009 jyldan beri jyl saiyn jariialanady. Ony qurastyrýshylar tulǵalardyń musylman qaýymyna, qoǵamdyq ómirge, saiasat pen mádenietke yqpalyn eskeredi. Tizim saiasat, din, kásipkerlik, qaiyrymdylyq, ǵylym, aqparat quraldary, óner jáne sportty qosa alǵanda, 13 baǵytty qamtidy.

Dimash Qudaibergen kim?

Dimash Qudaibergen – álemge tanylǵan qazaqstandyq ánshi, kompozitor, Qazaqstannyń halyq ártisi. Tolyq aty-jóni – Dinmuhammed Qanatuly Qudaibergen. Ol 1994 jyly 24 mamyrda Aqtóbe qalasynda ónerli otbasynda dúniege kelgen. Ákesi Qanat Aitbaev pen anasy Svetlana Aitbaeva da – ánshiler.

Dimash 2015 jyly Belarýstiń Vitebsk qalasynda ótken “Slavian bazary” halyqaralyq baiqaýynyń bas júldesin jeńip aldy. Al 2017 jyly Qytaidaǵy Singer jobasynda ekinshi oryn ielenip, halyqaralyq deńgeide keńinen tanyldy. Daýys múmkindigi men kúrdeli shyǵarmalardy oryndaý sheberligi sheteldik tyńdarmannyń nazaryn aýdardy.

Ánshi Qazaq ulttyq óner ýniversitetinde estrada óneri mamandyǵy boiynsha bilim alǵan. Ol álem sahnalarynda óner kórsetip, qazaq mýzykasyn sheteldik aýditoriiaǵa tanytyp júr. Shyǵarmashylyǵynda ulttyq mýzykanyń únin saqtaýǵa, jas urpaqtyń dástúrli aspaptarǵa qyzyǵýshylyǵyn arttyrýǵa mán beredi.