Nvidia direktorlar keńesi kompaniianyń negizin qalaýshylardyń biri ári 1993 jyldan beri basqaryp kele jatqan 63 jastaǵy Djensen Hýangtyń bolashaǵyn talqylaýǵa daiyndalyp jatyr. Bul týraly The Wall Street Journal derekkózderine silteme jasap habarlady.
Hýang 33 jyl ishinde Nvidia-ny videokarta óndirýshisinen jasandy intellekt indýstriiasynyń kóshbasshylarynyń birine ainaldyrdy. Qazir kompaniianyń naryqtyq quny 4 trillion dollardan asady. Alaida onyń basshylyq qyzmeti jeke ómirine qatysty janjaldan keiin qaýipke ushyrady.
The New York Times basylymy Hýangtyń kompaniiadaǵy taǵy bir joǵary laýazymdy qyzmetkermen nekeden tys qarym-qatynasta bolǵany týraly jazdy. Áńgime Nvidia-nyń densaýlyq saqtaý baǵytyna jaýapty vitse-prezidenti Kimberli Paýell týraly bolyp otyr. Ol tikelei Hýangqa baǵynyshty bolǵan. Jýrnalister kompaniiada jumys istegen bes adammen sóilesip, bul aqparatty rastaǵanyn málimdedi.
Janjal qazan aiynda bastalǵan. Sol kezde NYT Hýangtyń buryn Singapýrdyń Megaspeed kompaniiasynda basshylyq qyzmet atqarǵan Elis Hýang esimdi qytailyq áielmen bailanysy bolýy múmkin ekenin jazǵan. Bul kompaniia Nvidia-dan ozyq chipter satyp alǵan. Al AQSh biligi ony eksporttyq shekteýlerdi ainalyp ótip, tehnologiialardy Qytaiǵa jetkizýge kómektesti dep kúdiktengen.
Basylym derekterine sáikes, amerikalyq barlaý qyzmetteri Elistiń Beijińge aqparat jetkizgenin anyqtaǵan. Osydan keiin Hýangtyń sheteldik arnaiy qyzmetterdiń yqpalyna túsýi múmkin degen kúdik te paida bolǵan.
8 qarashada Djensen Hýang áieline opasyzdyq jasaǵanyn moiyndap, jubaiynan, balalarynan jáne kompaniia qyzmetkerlerinen kópshilik aldynda keshirim surady. Nvidia direktorlar keńesi bul jaǵdaiǵa bailanysty táýelsiz tergeý bastady. Oqiǵaǵa FBR de qyzyǵýshylyq tanytqan.
Sonymen qatar kompaniia aktsionerleri Nvidia-ǵa qarsy sotqa shaǵym túsirdi. Janjal aiasynda kompaniianyń naryqtyq quny júzdegen milliard dollarǵa tómendep, aktsiialary quldyrady.
Al Hýangtyń qyzmetinen ketýi múmkin ekeni týraly aqparat taraǵannan keiin Nvidia aktsiialary birjadan tys saýdada taǵy shamamen 8 paiyzǵa arzandaǵan.
