AQSh prezidenti Donald Tramp Ýkrainadaǵy soǵys jaqyn arada aiaqtalýy múmkin ekenin málimdedi. Alaida onyń aitýynsha, soǵys bitkennen keiin Ýkraina «birshama basqa keiipke» enýi yqtimal. Bul týraly ol CBS News telearnasyndaǵy «60 Minutes» baǵdarlamasyna bergen suhbatynda aitty, dep habarlaidy ult.kz.
Suhbat barysynda Tramp AQSh-tyń burynǵy prezidenti Djo Baiden ákimshiliginiń Ýkrainaǵa kórsetken qarjylai jáne áskeri kómegin synǵa aldy.
Onyń sózinshe, Baiden Kievke 350 milliard dollar kóleminde qarjy men qarý-jaraq bergen. Al Tramp ákimshiligi Ýkrainaǵa qarýdy tikelei tegin bermei, Eýropa elderine tolyq baǵasymen satyp otyrǵanyn aitty.
«Men olarǵa eshteńe bergen joqpyn. Qarýdy Eýropaǵa tolyq baǵasymen sattym, olar bizge aqsha tóleidi. Buǵan deiin mundai kómek kórsetilgenine kóńilim tolmady, óitkeni muny aqymaqtyq dep sanadym. Eýropanyń aqshasy bar, olar qarý-jaraqtyń aqysyn tólei alar edi», – dedi Tramp.
Jýrnalist AQSh kómeginiń nátijesinde Ýkrainanyń táýelsizdigin saqtap qalǵanyn aitqan kezde, Amerika prezidenti buǵan kelispedi.
«Ázirge olai bolǵan joq. Ázirge eshteńege qol jetkizgen joqsyzdar. Munyń sońy nemen aiaqtalatynyn kóreiik. Meniń oiymsha, túptiń túbinde Ýkraina birshama basqa keiipke enedi», – dedi ol.
Tramp soǵystyń aiaqtalýyna ne kedergi dep sanaidy?
AQSh prezidenti beibit kelisimge kelýge basty kedergi retinde Ýkraina prezidenti Vladimir Zelenskii men Resei prezidenti Vladimir Pýtin arasyndaǵy «shekten tys óshpendilikti» atady.
Soǵan qaramastan, Tramp eki tarappen de kelissóz júrgizip, soǵysty toqtatýǵa qaýqarly ekenin jetkizdi.
«Meniń oiymsha, bul soǵys aiaqtalady jáne ol jaqyn arada bitedi. Onyń aiaqtalýynyń jalǵyz sebebi – men bolamyn», – dep málimdedi AQSh basshysy.
Starlink jumysyna qatysty ne dedi?
Suhbatta Ýkraina aýmaǵyndaǵy Starlink spýtniktik bailanys júiesiniń jumysy baiaýlaýy nemese úzilýi múmkin degen másele de kóterildi.
Tramp jeliniń ádeii óshirilgenine qatysty ózinde eshqandai dálel joq ekenin aitty.
«Bilmeimin. Bul óte jaqsy júie. Onyń jumysy baiaýlaǵan bolýy múmkin, biraq maǵan muny rastaityn dálel usynǵan joq. Bul soǵysqa qatysty kóptegen jalǵan aqparat taralyp jatyr. Men bul týraly estigen kezde júieniń jumysy qalpyna keltirilgen edi», – dedi ol.
