Qazaqstandyq kásipker Qyrǵyzstan prezidenti Sadyr Japarovqa alaiaqtyqqa qatysty shaǵym aityp, 200 myń dollardan astam aqshasynan aiyrylǵanyn málimdedi. Memleket basshysy quqyq qorǵaý organdaryna isti jeke baqylaýǵa alyp, kúdiktilerdi ustaýdy jáne aqshany qaitarýǵa kómektesýdi tapsyrdy, dep habarlaidy ult.kz.
Oqiǵa Sadyr Japarovtyń qoǵam ókilderimen kezdesýinde bolǵan. Kezdesý barysynda mikrofon alǵan qazaqstandyq kásipker Qyrǵyzstannan karer satyp alǵanyn, alaida keiin satýshylardyń ony aldap, nysandy qaitadan óz ielikterine alyp qoiǵanyn aitty.
Kásipkerdiń sózinshe, alaiaqtardyń biri ózin Azamat Japarov dep tanystyryp, Qyrǵyzstan prezidentiniń týǵan jieni ekenin aitqan. Alaida keiin kásipker onyń memleket basshysyna eshqandai týystyq qatysy joq, tek attas adam ekenin anyqtaǵan.
Japarov kásipkerdiń shaǵymyna birden jaýap berip, Ishki ister ministrligi ókilderine isti jeke baqylaýǵa alýdy tapsyrdy.
«Kezdesý aiaqtalǵan soń ony birden qabyldap, barlyq mán-jaidy anyqtańyzdar. Aty atalǵan adamdardy ustańyzdar jáne 200 myń dollaryn qaitarýǵa kómektesińizder», – dedi Qyrǵyzstan prezidenti.
Ázirge quqyq qorǵaý organdarynyń kásipkerge aqshasyn qaitarýǵa qol jetkizgeni týraly aqparat joq.
