AQSh-tyń Florida, Alabama jáne Indiana shtattarynda bir kúnniń ishinde úsh adamnyń ólim jazasy oryndaldy. Bul týraly Associated Press agenttigi habarlady.
Floridada 64 jastaǵy Djessi Gýardodo ólim jazasyna kesildi. Ol 2004 jyly 75 jastaǵy Djeki Meloýndy óltirgeni úshin sottalǵan. Bul – Florida shtatynda 2026 jyldyń basynan beri oryndalǵan 19-ólim jazasy. Osylaisha shtat 2025 jyly ornatqan óz rekordyn qaitalady.
Alabamada 54 jastaǵy Maikl Teilorǵa ólimge ákeletin inektsiia jasaldy. Ol 19 jasynda tonaý kezinde 83 jastaǵy Ivan Mýr men onyń 79 jastaǵy áieli Liýsildi temir syryqpen uryp, ekeýiniń de ólimine sebep bolǵan.
Al Indiana shtatynda 50 jastaǵy Djeffri Vaishait ólim jazasyna kesildi. Ol 2010 jyly ózi tanys áieldiń úiin órtep, onyń eki balasynyń ólimine sebep bolǵan. Vaishait kinásin moiyndaǵanymen, advokattary ólim jazasyn ómir boiyna bas bostandyǵynan aiyrý jazasyna aýystyrýdy suraǵan. Alaida shtat gýbernatory keshirim berýden bas tartty.
Associated Press málimetinshe, AQSh-ta bir kúnde úsh shtatta úsh adamnyń ólim jazasyna kesilýi – sirek kezdesetin jaǵdai. Sońǵy ret mundai oqiǵa 2010 jyly bolǵan.
Aita keteiik, bul oqiǵalar Kaliforniia gýbernatorynyń qyzmet merzimi aiaqtalǵansha shtattaǵy ólim jazasyna kesilgen 548 adamnyń jazasyn jeńildetý nietin jariialaýymen tuspa-tus keldi.
AQSh-ta ólim jazasy federaldyq deńgeide de, keibir shtattarda da qoldanylady. Alaida ony joiý nemese saqtaý máselesi eldegi eń daýly quqyqtyq jáne saiasi taqyryptardyń biri bolyp qala beredi.
