AQSh prezidentiniń arnaiy ókili Stiv Ýitkoff X áleýmettik jelisinde jumys toptary deńgeiindegi úshjaqty kelissózder ótetin kúnin jariialady, dep habarlaidy ult.kz AXIOS basylymyna silteme jasap.
Onyń aitýynsha, AQSh deldaldyq jasaityn kelissózderde soǵystan keiingi qaýipsizdik jónindegi ýaǵdalastyqtar, áskeri shielenisti báseńdetý, gýmanitarlyq bastamalar jáne beibitshilikke qol jetkizýdiń kelesi qadamdary talqylanady.
Sonymen qatar, osy aptada AQSh ókilderi Briýsselde Frantsiia, Germaniia, Ulybritaniia, Eýropalyq odaq jáne NATO ókilderimen kezdesedi. Taraptar Ýkrainanyń qaýipsizdik kepildikterin, soǵystan keiingi Eýropanyń qaýipsizdik júiesin jáne Ýkrainany qalpyna keltirýge baǵyttalǵan ekonomikalyq múmkindikterdi talqylamaq.
Axios basylymynyń habarlaýynsha, kelesi aptadaǵy kelissózderde AQSh delegatsiiasyn Stiv Ýitkoff pen Donald Tramptyń kúieý balasy Djared Kýshner basqarýy múmkin.
Resei taraby da kezdesý ótetinin rastady. Kremldiń baspasóz hatshysy Dmitrii Peskov Resei delegatsiiasy 10–11 qarashada Ábý-Dabide bolatynyn málimdedi. Máskeýdiń bas kelissóz júrgizýshisi burynǵy mádeniet ministri Vladimir Medinskii bolyp qala beredi.
Peskovtyń aitýynsha, Resei delegatsiiasynyń músheleri kelissózge deiin prezident Vladimir Pýtinge aǵymdaǵy máseleler boiynsha baiandama jasap, tiisti nusqaýlar alady.
Basqa málimdemeleri:
🔸 Kreml Ýkraina armiiasyndaǵy adam tapshylyǵy máselesi aldaǵy ýaqytta kúsheie túsedi dep esepteidi.
🔸 Resei Ýkraina qarýly kúshteriniń energetikalyq infraqurylymǵa shabýyldary jalǵasyp jatqanyn málimdedi.
🔸 Máskeý óz energetikalyq nysandaryn qorǵaý sharalaryn kúsheitkenin, biraq shabýyldardan tolyq qorǵaný múmkin emes ekenin aitty.
🔸 Resei Ýkraina infraqurylymyna aýqymdy soqqylar jasaýdy jalǵastyratynyn málimdedi.
🔸 Kreml Vladimir Pýtin, Donald Tramp jáne Si Tszinpinniń úshjaqty kezdesýin uiymdastyrý jumystary jaqyn arada aiaqtalady dep úmittenedi.
Aldaǵy Ábý-Dabi kelissózderiniń negizgi máselesi – soǵysty toqtatý ǵana emes, soǵystan keiingi qaýipsizdik tártibiniń qandai bolatynyn kelisý.
