Tanymal ánshi ári kinoprodiýser Serik Ibragimov "Intelligentno qý" jobasynda qonaq bolyp, alǵashqy "Zamanback" filmin túsirý jolynda bastan ótkergen qiyndyqtaryn jáne tabysqa jetkennen keiingi ózgeristerin aityp berdi, dep habarlaidy ult.kz.
Óner iesiniń sózinshe, kino túsirý týraly sheshim qabyldaǵanda onyń bastamasyna kópshilik kúmánmen qaraǵan. Tipti jaqyn tanystarynyń arasynda bul oiynan bas tartýǵa keńes bergender de bolǵan. Alaida ánshi táýekelge bel býyp, jobany júzege asyrý úshin qaryz alýǵa májbúr bolǵan.
"Eshkim sengen joq qoi. Tek áielim men azyn-aýlaq dostarym sendi. Áielime raqmet", – dedi ol.
Serik Ibragimov alǵashqy filmin nebári bir million teńgemen bastaǵanyn aitty. Keiin túsirilimge qajetti qarajatty jinaý úshin tanystaryna júgingen. Alaida olardyń bári birdei qoldaý kórsete qoimaǵan.
"Bir million teńgemen bastap, árkimnen qaryz surap túsirip aldym. Kinonyń shyǵyny 130-140 milliondai boldy. Sol kezde bárińe renjip qalǵanmyn. 200 myń teńge surasam, bermegen kezder boldy", – dep eske aldy ánshi.
Qiyn sátte qol ushyn sozǵan jandardyń biri – ánshi Meirambek Bespaev. Serik Ibragimov ónerdegi aǵasynyń aqyl-keńesi men qoldaýy alǵashqy jobasyn júzege asyrýǵa septigin tigizgenin atap ótti.
Degenmen "Zamanback" filminiń tabysqa jetýi ánshiniń ózine de áser etken. Ol kópten kútken armany oryndalǵan soń minezinde ózgeris bolyp, tákapparlyqqa boi aldyrǵanyn jasyrmady.
"Men qatty esirdim. Negizi, Qudaidan: "E, Qudai, bershi maǵan", – dep surap alǵan dúniem ǵoi. Sonymen, aqshanyń jaratatynyn jaratyp, mashina aldyq, úittik, búittik", – dedi óner iesi.
Osylaisha, Serik Ibragimov alǵashqy filmin túsirý úshin qaryzǵa belshesinen batqan kezeńin de, kópten kútken jetistikten keiin ózin ózgeshe ustai bastaǵanyn da ashyq moiyndady.
Serik Ibragimov kim?
Serik Ibragimov – qazaqstandyq estrada ánshisi, "Daryn" memlekettik jastar syilyǵynyń laýreaty jáne kinoprodiýser. Ol 1988 jyly 22 qańtarda Qyzylorda oblysynyń Túgisken aýylynda dúniege kelgen. Kópbalaly otbasynda tárbielenip, bes jasynan bastap sahnaǵa shyqqan.
Aldymen Qyzylorda mýzykalyq kolledjinde, keiin Qurmanǵazy atyndaǵy Qazaq ulttyq konservatoriiasynda bilim alǵan. Óner iesi "Vokzalda qaýyshqan qyz" áni arqyly kópshilikke keńinen tanyldy.
Onyń repertýarynda "Kel maǵan", "Jaiaý", "Qazaqpyz bárimiz" sekildi tanymal ánder bar.
2014 jyly Eýraziialyq mýzyka syilyǵynyń "Jyl jańalyǵy" nominatsiiasyn jeńip alsa, 2018 jyly "Daryn" memlekettik jastar syilyǵyna ie boldy.
Keiin kino salasyna bet buryp, 2024 jyly kórermenge jol tartqan "Zamanback" filminiń prodiýseri atandy.
