Almaty qalasynyń Almaly aýdandyq sotynda Sanjar Boqaevqa, onyń jieni Madiar Qalmenovke jáne jeke mobilografy Ulan Núsipqojaǵa qatysty qylmystyq is boiynsha kezekti sot otyrysy bastaldy.
Boqaevqa alaiaqtyq, qylmystyq jolmen alynǵan kiristerdi zańdastyrý, urlyq jasaý, aǵashtardy zańsyz kesý jáne kórineý jalǵan aqparat taratý aiyptary taǵylǵan. Qalmenov alaiaqtyq jáne qylmystyq kiristerdi zańdastyrý, al Núsipqoja qalǵan úsh epizod boiynsha aiyptalyp otyr.
Qazirgi ýaqytta avtosherý uiymdastyrýǵa arnalǵan kelisimsharttardyń jasalý mán-jailaryna, merdiger kompaniialardyń tańdalýyna jáne osy maqsattarǵa kásipodaq qarajatynan bólingen aqshanyń keiingi qozǵalysyna qatysty alaiaqtyq pen qylmystyq jolmen alynǵan kiristerdi zańdastyrý derekteri boiynsha kýágerlerden jaýap alý jalǵasyp jatyr.
Eske salsaq, aldyńǵy sot otyrysynda «QazaqGaz» UK» AQ departamentiniń bas menedjeri ári kásipodaqtyń tekserý komissiiasynyń múshesi Medetbek Ábdiqalyqov aýdit barysynda anyqtalǵan «BM Trust» jáne «We Can» kompaniialarymen jasalǵan kúmándi kelisimsharttar týraly aityp bergen edi.
Onyń sózinshe, básekelestik ortaǵa qaramastan, kelisimsharttar bir ǵana kompaniialarmen qaita-qaita jasalǵan. Sonymen qatar smetalarda kórsetilgen qyzmet qunyn negizsiz kóterý belgileri anyqtalǵan. Al merdigerler Boqaevtyń tarapynan usynylyp, ózge kompaniialar, iaǵni balama nusqalar esh qarastyrylmaǵan.
Sondai-aq, kýáger jymqyrý belgilerin anyqtaǵannan keiin zańbuzýshylyqtardy jasyrýdy múlde oilamaǵanyn, bloger eken dep Boqaevtan múlde qaýiptenpegenin atap ótti. Zańǵa qaishy derekter anyqtalǵan soń kúmándi kelisimsharttarǵa qatysty materialdar quqyq qorǵaý organdaryna joldanǵan.
Budan bólek, revizordyń pikirinshe, imidjdik is-sharalardy qarjylandyrý «QazTransGaz» AQ-nyń jarǵylyq mindetterine kirmegen.
Taǵy bir kýáger – «BM Trust» JShS-nyń negizin qalaýshy Janbolat Maratov bastapqyda kompaniia katamarandardy jalǵa berýmen ainalysqanyn jáne túrli is-sharalardy uiymdastyrýǵa esh qatysy bolmaǵanyn málimdedi.
Onyń aitýynsha, 2017 jyly Boqaev firmany óziniń jieni Madiar Qalmenovtiń atyna qaita rásimdeýdi usynǵan. Keiinnen kompaniia «QazTransGaz» úshin túrli is-sharalardy uiymdastyrýǵa arnalǵan merdigerlik tapsyrystardy ala bastaǵan.
Bul rette, Maratov merdigerlermen jasalǵan kelisimsharttardyń barlyǵyna Boqaevtyń kabinetinde qol qoiylǵanyn alǵa tartqan bolatyn.
