Advokat Lázzat Raqysheva Natasha Qalymbetovanyń qyzynyń shetelge asyrap berilýine qatysty mán-jaidy anyqtaýdy surady. Ol áleýmettik jelidegi jazbasynda Ishki ister ministrligi men Bas prokýratýraǵa úndeý joldap, balanyń qandai negizde jáne kimniń sheshimimen elden áketilgenin tekserý qajettigin aitty, dep habarlaidy ult.kz.
Advokattyń jazbasyna kishkentai chemodanyn súiretip, eresektermen birge ketip bara jatqan qyzdyń sýreti sebep bolǵan. Raqysheva sýrettegi balanyń sol kezdegi jasyn altyda dep kórsetip, onyń anasynan ajyraǵan sátine qatysty tolǵanysyn jetkizdi.
«Qaida bara jatqanyńdy, kimge erip bara jatqanyńdy, alda seni ne kútip turǵanyn bilmei, kishkentai chemodanyńdy súiretip bara jatyrsyń… Nebári alty jastasyń… Sol sátte kishkentai júregińde ne boldy eken? Anańnan nege alystap bara jatqanyńdy túsindiń be eken? Qoryqtyń ba eken?» – dep jazdy advokat.
Onyń aitýynsha, qyzdyń AQSh-qa áketilýine bailanysty jaýapsyz qalǵan suraq kóp. Atap aitqanda, balany sheteldik otbasyǵa berý rásiminiń qalai júrgizilgeni, oǵan qandai qujattar negiz bolǵany jáne sheshimdi kim qabyldaǵany anyqtalýy kerek.
Raqysheva sýrettegi eresekterdiń, sonyń ishinde aýdarmashy bolýy múmkin áieldiń kim ekenin anyqtaý máselesin de kóterdi. Alaida jazbada bul áieldiń naqty kim ekeni týraly rastalǵan aqparat keltirilmegen.
«Nege Natasha osy ýaqytqa deiin jalǵyz ózi qyzynyń taǵdyryn izdep, quqyǵyn qorǵaýǵa májbúr? Nege memlekettik organdar bul isti óz baqylaýyna almaidy?» – dep saýal qoidy ol.
Advokat quzyrly organdardy oqiǵanyń mán-jaiyn jan-jaqty tekserýge shaqyryp, osyndai jaǵdaiǵa tap bolǵan ózge balalardyń bar-joǵyn da anyqtaý qajet ekenin aitty.
Aita keteiik, Natasha Qalymbetova qýanyshty jańalyǵyn aitty.
Natasha Qalymbetova kim?
Eske salaiyq, Natasha Qalymbetova buǵan deiin 17 jasynda jynystyq zorlyqqa ushyraǵanyn, sodan keiin dúniege kelgen qyzyn keiin amerikalyq otbasy asyrap alǵanyn aitqan. Ol uzaq jyldar boiy balasyn izdegen.
Sońǵy jariialanǵan málimetke sáikes, Qalymbetova AQSh-ta qyzymen kezdeskenin jáne ekeýi DNQ saraptamasyn tapsyrǵanyn habarlaǵan.
Degenmen kezdesý qyzdyń kezinde shetelge asyrap berilýine qatysty barlyq suraqqa jaýap bermeidi: Raqysheva óz jazbasynda osy rásimniń zańdylyǵyn tekserý máselesin kóterip otyr.
