Almaty qalasynyń Almaly aýdandyq sotynda Sanjar Boqaevqa qatysty is boiynsha «Nur Otannyń» burynǵy ideologynyń alaiaqtyq shemasynyń sońǵy kezeńin, iaǵni «QazTransGaz» kásipodaǵynyń qarajatyn qolma-qol aqshaǵa ainaldyryp, ony sottalýshynyń jeke biznesine jumsaý áreketterin ashyp kórsetetin aiǵaqtar jariia etildi.
Sotta «MLS-Group» JShS-nyń burynǵy quryltaishysy ári direktory Jarmuhamed Sultanovtan jaýap alyndy. Sultanovtyń aitýynsha, ol Boqaevpen Almaty qalasynyń Jastar saiasaty basqarmasynda birge jumys istegen jáne sol kezden beri tanys. Sol ýaqytta ol Boqaevqa baǵynyshty qyzmette bolǵan. 2018 jyly Boqaev oǵan Madiiar Qalmenovtiń atyna rásimdelgen «BM Trust» JShS atynan yntymaqtastyq máseleleri boiynsha júgingen. Sot otyrysynda «MLS-Group» JShS-nyń bank kóshirmeleri zerttelip, onda «BM Trust»-tan túsken eki transh tirkelgeni anyqtaldy.
Alǵashqy aýdarylǵan transhtyń kólemi 5,6 million teńgeni qurap, kórsetilgen tólemniń maqsaty retinde «jarnama salasyndaǵy qyzmetter úshin» degen anyqtama tańdalǵan. Sultanov bul qarajattyń bir bóligi shynymen de «QazTransGazǵa» arnalǵan beinerolikterdi túsirýge jumsalǵanyn rastady. Alaida dál osy qarajatqa Sanjar Boqaev ózine tiesili «Art Romance» jihaz tsehy úshin sait jasatyp, tsehtyń jarnamasyna arnalǵan beinerolikterdiń jumystaryn da tólegen.
Ekinshi transh 12,3 million teńgeni quraǵan. Bul qarajat avtosherý týraly derekti film túsirýge arnalǵan. Kýágerdiń túsindirýinshe, kompaniia merdigerlerdi taba almaǵandyqtan, film túsirilmegen. Sultanov bul týraly Boqaevqa habarlaǵan kezde, ol filmdi túsirýmen ózi ainalysatynyn aitqan.
Sultanovtyń sotta bergen aiǵaqtaryna sáikes, osydan keiin 12,3 million teńge ózine baǵynyshty jeke kásipker arqyly qolma-qol aqshaǵa ainaldyrylyp, Boqaevqa berilgen. Bas figýranttyń qorǵaýshylary kýágerden aqshany berý sátin bireýdiń kórgen-kórmegenin naqtylady. Sultanov «mundaidy tis jaryp eshkimge aitpaidy» alǵa tartyp, «joq» dep jaýap berdi.
Jariia etilgen derekter memlekettik aiyptaý tarapynyń qyzmet kórsetý kelisimsharttarynyń jalǵan sipatyn dáleldep, kásipodaqtan jymqyrylǵan qarajat qolma-qol aqshaǵa ainaldyrylyp, Boqaevtyń jeke biznesin qarjylandyrýǵa baǵyttalǵany týraly nusqany tolyq rastaidy.
Jaýap alý barysynda qorǵaýshylar kýágerdiń aiyptalýshymen ortaq kommertsiialyq múddelerdiń bar-joǵyna da toqtaldy. Boqaev advokattarynyń mundai saýalyna Sultanov aiyptalýshymen AQSh-ta ortaq biznes júrgizgenin rastady.
Kýágerdiń aitýynsha, kásiporyn 2024 jyldyń sońynda nemese 2025 jyldyń basynda Tehas shtatynda ashylǵan. Jobadaǵy baqylaýshy úles, iaǵni 60 paiyzy Sanjar Boqaevqa tiesili bolǵan. Al Sultanov, sondai-aq Qaraev tegimen belgili taǵy bir seriktes 20 paiyzdan ielengen. Sultanov amerikalyq bizneske 500 myń dollar investitsiia salynǵanyn naqtylady.
