Almaty qalasynyń Almaly aýdandyq sotynda Sanjar Boqaevqa, onyń jieni Madiiar Qalmenovke jáne jeke mobilografy Ulan Núsipqojaǵa qatysty qylmystyq is boiynsha kezekti sot otyrysy bastaldy. Sottalýshylarǵa alaiaqtyq, qylmystyq jolmen alynǵan kiristerdi zańdastyrý, urlyq, aǵashtardy zańsyz kesý jáne kórineý jalǵan aqparat taratý aiyptary taǵylyp otyr.
Sanjar Boqaevqa atalǵan bes baptyń barlyǵy boiynsha aiyp taǵylsa, Madiiar Qalmenov alaiaqtyq jáne qylmystyq jolmen alynǵan aqshany zańdastyrý epizodtary boiynsha, al Ulan Núsipqoja urlyq, aǵashtardy zańsyz kesý jáne kórineý jalǵan aqparat taratý faktileri boiynsha aiyptalýda.
Buǵan deiin, 27 qazanda ótken sot otyrysynda kýágerlerden jaýap alynǵan bolatyn. Olardyń aiǵaqtary memlekettik aiyptaý tarapynyń nusqasyn, iaǵni «QazTransGaz» kásipodaǵynyń qarajaty esebinen avtosherý uiymdastyrýǵa arnalǵan sharttardyń jalǵan sipatyn tolyq rastady.
Atap aitqanda, kásipodaqtyń burynǵy tóraiymy Záýresh Mahanova jobaǵa «BM Trust» jáne «We Can» kompaniialaryn tartý bastamasyn Sanjar Boqaev kótergenin málimdedi. Onyń aitýynsha, Madiiar Qalmenov aldyn ala ázirlengen, somalary kórsetilgen sharttardy ákelip otyrǵan, al oryndalǵan jumystardyń aktilerin ol jeke Boqaevtyń kabinetinen ózi alyp ketip júrgen.
Sondai-aq, 2018 jyly «QazTransGaz Ónimderi» JShS-niń korporativtik damý jáne aktivterdi basqarý departamentiniń direktory qyzmetin atqarǵan Talǵat Arystanbaev sotta kýálik etti. Ol avtosherýdiń uiymdastyrý jumystarymen is júzinde tek «We Can» kompaniiasy ainalysqanyn rastady.
Eske sala keteiik, buǵan deiin Ulan Núsipqojanyń advokaty óz qorǵaýyndaǵy azamattyń taǵylǵan aiyptardy moiyndaýǵa jáne bolǵan oqiǵanyń mán-jailary, sonyń ishinde Sanjar Boqaevqa qatysty jaittar týraly aiǵaq berýge daiyn ekenin málimdegen bolatyn.
