Almaty qalasynyń Almaly aýdandyq sotynda Sanjar Boqaevqa qatysty qylmystyq is boiynsha sot otyrysy jalǵasyp jatyr. Búgin sotta «QazTransGaz» AQ 2015-2020 jyldar aralyǵynda basqarǵan Rýstam Súleimanov jaýap berdi. Kompaniianyń burynǵy basshysy óz jaýabynda bas direktor keńesshisi qyzmetin atqarǵan Boqaevtyń óz betinshe áreket etkenin jáne barlyq sheshimdi ózi qabyldaǵanyn málimdedi.
Súleimanovtyń túsindirýinshe, ol Boqaevty bul qyzmetke ózi taǵaiyndamaǵan jáne onyń jumysqa qabyldaný mán-jailaryn esine túsire almady. Boqaev is júzinde kompaniia basshysynyń keńesshisi retinde jumysqa 2015 jylǵy 30 qazan kúni kirisken. Ol kezde «QazTransGaz» AQ Qairat Sháripbaev basqarǵany belgili. Keiin Boqaev Qoǵammen bailanys departamentiniń jumysyn úilestirip, derbes áreket etken ári jańa basshylyqty óz jumysynyń jai-japsary týraly habardar etpegen.
Súleimanovtyń aitýynsha, avtosherý ótkizý týraly tapsyrma «joǵarydan» – bas kompaniiadan túsken. Korporativtik biýdjet bolmaǵandyqtan, is-sharany qarjylandyrý kásipodaqqa júktelgen. Al barlyq jumysty tolyǵymen Boqaev úilestirgen.
Rýstam Súleimanov sotqa avtosherýdiń qarjylyq jáne uiymdastyrý jumystarynan habarsyz bolǵanyn aitty. Ol kelisimsharttardy kórmegen, shyǵyndar smetasyn teksermegen jáne kásipodaq komiteti otyrystarynyń hattamalaryn almaǵan. Basshylyq jumystyń nátijesin tek usynylǵan sýretter men beinematerialdar arqyly baǵalaǵan. Sonymen qatar burynǵy bas direktor «WeCan» JShS direktory Juldyz Artyqbaevany da, «BM Trust» JShS direktory Madiiar Qalmenovti de tanymaitynyn rastady.
Boqaevtyń óz betinshe áreket etkeni týraly jaittar buǵan deiin kásipodaqtyń burynǵy tóraiymy Záýresh Mahanovanyń sotta bergen jaýabymen de rastalǵan bolatyn. Ótken otyrysta ol jobaǵa «BM Trust» jáne «WeCan» kompaniialaryn tartýdy Sanjar Boqaevtyń ózi usynǵanyn málimdegen. Bul rette bas figýranttyń jieni Madiiar Qalmenov qol qoiýǵa somalary aldyn ala toltyrylǵan daiyn kelisimsharttardy ákelip otyrǵany aityldy. Al oryndalǵan jumystardy rastaityn qujattardy Mahanova tikelei Boqaevtyń kabinetinen alyp ketip júrgen.
Qylmystyq is materialdaryna sáikes, osy shema arqyly iske qatysy bar tulǵalar kásipodaq qarajatynan 42 million teńgeni kedergisiz shyǵaryp alǵan.
