Almaty qalasynyń Almaly aýdandyq sotynda «QazTransGaz» basshysynyń burynǵy keńesshisi ári «Nur Otan» partiiasynyń burynǵy ideology Sanjar Boqaevtyń isi boiynsha kezekti sot otyrysy bastaldy. Basty figýrantpen birge aiyptalýshylar oryndyǵynda onyń jieni Madiiar Qalmenov pen jeke videografy Ulan Núsipqoja otyr.
Aldyńǵy sot otyrysynda Sanjar Boqaevtyń jeke mobilografy Ulan Núsipqoja urlyq, aǵashtardy zańsyz kesý jáne kórineý jalǵan aqparat taratý aiyptary boiynsha óz kinásin tolyq moiyndady. Advokatynyń aitýynsha, aiyptalýshy sotqa óziniń áreketteri týraly ǵana emes, sonymen qatar qylmystyq is boiynsha basqa da qatysy bar adamdardyń róli týraly egjei-tegjeili aiǵaq berýge daiyn. Núsipqoja bul ustanymyn eki ret rastady.
Budan bólek, buǵan deiin sotta jábirlenýshi retinde jaýap bergen «QazTransGaz» AQ-nyń burynǵy zańgeri ári kásipodaq komitetiniń hatshysy Muhtar Ámirhanov 2018 jyly «Batys Qytai – Batys Eýropa» baǵyty boiynsha halyqaralyq avtosherý uiymdastyrýǵa arnalǵan sharttardy jasasýǵa Sanjar Boqaevtyń bastamashy bolǵanyn málimdedi. Onyń aitýynsha, sol kezde «QazTransGaz» AQ basshysynyń keńesshisi qyzmetin atqarǵan Boqaev kompaniianyń kásipodaq komitetiniń otyrysyna qatysyp, jobaǵa «BM Trust» jáne «We Can» kompaniialaryn tartýdy usynǵan.
Eske sala keteiik, Sanjar Boqaev asa iri mólsherdegi alaiaqtyq, qylmystyq jolmen alynǵan kiristerdi zańdastyrý, urlyq, aǵashtardy ruqsatsyz kesý jáne kórineý jalǵan aqparat taratý baptary boiynsha aiyptalyp otyr. Óz kezeginde Madiiar Qalmenov alaiaqtyq pen zańsyz jolmen alynǵan qarajatty zańdastyrýǵa qatysty epizodtar boiynsha jaýapqa tartylyp jatyr. Al Ulan Núsipqojaǵa urlyq, aǵashtardy zańsyz kesý men jalǵan málimetter taratýǵa qatysy bar degen aiyptar taǵylǵan.
