Qyzylordada bir top adamnyń shabýylynan kóz jumǵan jas jigittiń ólimine qatysty úsh kúdikti ustaldy. Marqumnyń týystary oqiǵaǵa 12 adam qatysqanyn aityp, shabýylǵa qatysy bar ár adamnyń áreketine quqyqtyq baǵa berilýin talap etip otyr, dep habarlaidy ult.kz.
Qyzylorda oblystyq politsiia departamentiniń málimetinshe, adam óltirý deregi boiynsha qylmystyq is qozǵaldy. Úsh kúdikti ustalyp, ýaqytsha ustaý izoliatoryna qamaldy.
Politsiia ókilderi oqiǵaǵa qatysty barlyq beinejazba zerttelgenin habarlady. Sondai-aq qylmysqa basqa adamdardyń qatysy bolýy múmkin degen aqparat tekserilip jatyr. Tergeý qorytyndysy boiynsha ár kúdiktiniń róli men qatysý dárejesine quqyqtyq baǵa beriledi.
Qaiǵyly oqiǵa 8 qazanda Qyzylordadaǵy dámhanalardyń biriniń mańynda bolǵan. Aldyn ala málimet boiynsha, birneshe jigit jas azamatqa shabýyl jasap, ony pyshaqtaǵan. Jábirlenýshi aýrýhanada kóz jumdy.
Marqumnyń ápkesi Anastasiianyń aitýynsha, baýyryna 12 adam jabylyp, soqqyǵa jyqqan. Onyń sózinshe, kýágerler de shabýylǵa qatysqandardyń sany 12 adam bolǵanyn aitqan.
Marqumnyń týystary tergeýdiń tek ustalǵan úsh kúdiktimen shektelmei, oqiǵaǵa qatysy bolýy múmkin barlyq adamnyń áreketin anyqtap, árqaisysyna zań aiasynda baǵa berilýin talap etip otyr.
Qazirgi ýaqytta politsiia oqiǵanyń barlyq mán-jaiyn anyqtap jatyr.
