Baspananyń shyn iesi túrmede jazasyn ótep jatqanda, alaiaq onyń páterin satyp, aqshasyn jumsap jibergen. Sot ony bas bostandyǵynan aiyrýǵa úkim shyǵarǵanymen, jazany óteýdi keiinge qaldyrdy, dep habarlaidy ult.kz.
«Diapazon» basylymynyń jazýynsha, Aqtóbe qalasynda áiel ózine tiesili emes páterdi 6 mln 280 myń teńgege satyp jibergen.
Oqiǵa aqtóbelik er adamnyń Mádina esimdi áielmen tanysýynan bastalǵan. Er adam páter satyp alǵysy keletinin aitqanda, áiel Eset batyr turǵyn alabyndaǵy eki bólmeli baspanasyn usynǵan. Baǵasy 6 mln 280 myń teńge bolyp kelisilgen.
Satyp alýshy páterdi unatyp, bir aptadan keiin aqshany tolyq tólegen. Artynsha ata-anasyn jańa baspanaǵa kóshirip ákelgen. Alaida áiel satyp alý-satý shartyn rásimdeýdiń ornyna jyljymaityn múlikti qabyldaý-tapsyrý aktisin bergen.
2026 jyldyń qańtarynda páterge basqa áiel kelip, ózin baspananyń zańdy iesi retinde tanystyrǵan. Keiin sotqa júginip, páterge ornalasqan adamdardy shyǵarýǵa qol jetkizgen. Sóitip, satyp alýshynyń aqshasyn tólep alǵan baspanasy ózgeniń menshigi bolyp shyqqan.
Belgili bolǵandai, páterdiń shynaiy iesi Atyraý oblysyndaǵy koloniiada jazasyn ótep jatqan kezde kiltterin tanysyna qaldyrǵan. Jazasyn óteýdi keiinge qaldyrýǵa ruqsat alǵan soń úiine oralmaq bolǵanda, baspanasynda bóten adamdar turyp jatqanyn kórgen.
Sot otyrysynda Mádina kinásin moiyndaǵan. Ol páter úshin alǵan aqshany jumsap qoiǵanyn jáne ony satyp alýshyǵa qaitara almaitynyn aitqan. Sonymen qatar onyń buǵan deiin de alaiaqtyq jasaǵany úshin sottalǵany anyqtalǵan. Ol kezde balalarynyń bolýyna bailanysty jazasyn óteý keiinge qaldyrylǵan.
Bul joly sot áieldi bas bostandyǵynan aiyrýǵa úkim shyǵardy. Alaida jazany óteý merzimi taǵy da keiinge shegerildi. Osylaisha, sot úkimi jariialanǵannan keiin áiel sot ǵimaratynan bostandyqqa shyqqan.
