Qazaqstandyqtar «Dos-Muqasan» ansambliniń negizin qalaýshylardyń biri Murat Qusaiynovqa «Qazaqstannyń halyq ártisi» ataǵyn berýdi surap, ePetition resmi memlekettik platformasynda petitsiia jariialady, dep habarlaidy ult.kz.
Petitsiia avtorlarynyń jazýynsha, 2027 jyly «Dos-Muqasan» ansambliniń qurylǵanyna 60 jyl tolady. Murat Qusaiynov jarty ǵasyrdan astam ýaqyt boiy «Dos-Muqasan» ansamblin basqaryp keledi. Bul – rok jáne pop-mýzykany qazaqtyń halyq ánderimen ushtastyrǵan Qazaqstandaǵy alǵashqy kásibi vokaldy-aspaptyq ansambl. Murat Qusaiynov atalǵan qurmetti ataqqa qoiylatyn zań talaptaryna tolyq sáikes keledi. Alaida Mádeniet jáne aqparat ministrliginiń 2025 jylǵy jeltoqsandaǵy jaýabynda oǵan qatysty marapattaý týraly ótinishhat áli kúnge deiin berilmegeni rastalǵan.
"Biz, Qazaqstan azamattary, osy ádiletsizdikti túzetýdi suraimyz" delingen petitsiiada.
