Respýblika kúni qarsańynda Prezident eldiń áleýmettik-ekonomikalyq jáne mádeni-rýhani damýyna eleýli úles qosqan bir top azamatty memlekettik nagradalarmen marapattaldy. Olardyń qatarynda teatr jáne kino akteri Dáýren Serǵazin de bar. Memleket basshysy oǵan «Qurmet» ordenin tabystady, dep habarlaidy ult.kz.
«Óner salasynda júrgenime biyl 20 jyl toldy. Bul marapatty sol eńbegimniń qorytyndysy dep bilemin. Marapat jaýapkershilikti odan ári arttyryp, Qazaqstan halqyna mádeniet salasynda qyzmet etýge jańa kúsh-jiger beredi. Sondyqtan óte qýanyshtymyn. Barsha qazaqstandyqtardy aitýly merekemen quttyqtaimyn! Aspanymyz ashyq, zamanymyz tynysh bolsyn! Ár shańyraqqa jaqsylyq tileimin. Ár azamat elimizdiń damýyna óz úlesin qossa, nur ústine nur bolar edi», - dedi Dáýren Serǵazin "Qazaqstan" ulttyq arnasyna bergen suhbatynda.
Dáýren Serǵazin kim?
Dáýren Serǵazin — qazaqstandyq teatr jáne kino akteri, teatr rejisseri ári telejúrgizýshi. Qazaqstannyń eńbek sińirgen qairatkeri.
Týǵan kúni: 6 qazan 1984 jyl
Týǵan jeri: Temirtaý qalasy
Óner joly
Bilimi: 2002–2006 jyldary T. Júrgenov atyndaǵy Qazaq ulttyq óner akademiiasynda akterlik óner mamandyǵyn oqyǵan. Ustazy — Nurqanat Jaqypbai.
Teatr: 2007 jyldan bastap Astanadaǵy «Jastar» teatrynda eńbek etedi.
Kinodaǵy tanymal rólderi: «Jaýjúrek myń bala» filmindegi Sábit, «Aldar kóse» týyndysyndaǵy Aldar kóse, «Qara shańyraq» telehikaiasyndaǵy Mádi.
Marapattary: 2018 jyly «Sahnager» ulttyq teatr syilyǵynda «Jyldyń úzdik akteri» atanyp, sol jyly Qazaqstannyń eńbek sińirgen qairatkeri ataǵyn alǵan.
Dáýren Serǵazin komediialyq jáne dramalyq rólderdi somdap qana qoimai, teatr qoiylymdaryn da sahnalaidy. Ol kórermenge «Brat ili brak» filmder seriiasy arqyly da tanys.
