Abai oblysynda ulttyq mereke – Respýblika kúniniń qarsańynda HH ǵasyrdyń basynda ómir súrgen ult qairatkerleriniń aǵartýshylyq murasyn jańǵyrtýǵa arnalǵan kóptomdyq jinaqtyń tusaýkeseri ótti. Sharaǵa oblys ákimi Berik Ýáli, jazýshy, dintanýshy Qairat Joldybaiuly, aimaqtyń ziialy qaýym ókilderi qatysty.
El Táýelsizdiginiń 35 jyldyǵyna orai «Miras» seriiasy aiasynda ázirlengen 35 tomdyq eńbek balalarǵa arnalǵan oqýlyqtardan, tanymdyq eńbekterden, aýdarmalardan quralǵan. Alǵash ret jaryq kórip otyrǵan biregei jinaq bilim berý, ǵylymdy damytý jáne ulttyq sanany qalyptastyrý jolynda eńbek etken qazaqtyń kórnekti tulǵalarynyń rýhani murasyn búgingi oqyrmanǵa tanystyrýdy kózdeidi.
Aimaq basshysy joba Qazaqstan Respýblikasynyń Prezidenti Qasym-Jomart Toqaevtyń kitap oqý mádenietin damytý jáne zerdeli ult qalyptastyrý jónindegi bastamalaryn qoldaý maqsatynda qolǵa alynǵanyn atap ótti.
Foto: Abai oblysy ákimdigi
«Biyl 16 mamyr kúni Qazaqstan Respýblikasynyń Prezidenti Qasym-Jomart Kemeluly Toqaev ult bolashaǵyn aiqyndaityn, adam kapitalyn damytýǵa tikelei yqpal etetin tarihi Jarlyqqa qol qoidy. Bul mańyzdy qujat kitap oqý mádenietin damytý jáne zerdeli ult qalyptastyrý sharalaryn qamtidy. Memleket basshysynyń tapsyrmasyna orai biz qasietti Abai óńirinde osy baǵytta kóptegen jumysty bastadyq. Solardyń biri de biregeii – Sizderdiń qoldaryńyzǵa tigeli otyrǵan «Miras» seriiasynyń aiasynda ázirlengen 35 tomdyq jinaq», – dedi Berik Ýáli.
Jinaqqa Turaǵul Abaiuly, Spandiiar Kóbeev, Álihan Bókeihan, Ahmet Baitursynuly, Mirjaqyp Dýlatuly, Júsipbek Aimaýytuly, Halel Dosmuhameduly, Maǵjan Jumabaiuly, Muhtar Áýezov jáne basqa da qazaq ziialylarynyń eńbekteri engen. Kitaptar mazmunyna qarai «Jaratylystaný», «Ádebi aýdarmalar» jáne «Balalarǵa bazarlyq» dep atalatyn irgeli úsh bólimge toptastyrylǵan.
Bul sol kezdegi qazaq ziialylarynyń halyqty aǵartý, jurtty tárbieleý, qazaq balalaryn álemdik ǵylym men mádenietten sýsyndatý maqsatyndaǵy ultqa qyzmetiniń ónegeli úlgisi. Sol zamanda qandai mańyzdy bolsa, qazir de qundylyǵyn joimaǵan biregei eńbek.
Tuńǵysh ret bir joba aiasynda jaryq kórgen tarihi eńbekter qazirgi oqyrmannyń jas erekshelikterine beiimdelip, sapaly illiýstratsiialarmen tolyqtyrylǵan. Bul kitaptardyń mazmunyn balalarǵa túsinikti etip jetkizýge jáne kitap oqýǵa degen qyzyǵýshylyǵyn arttyrýǵa múmkindik beredi.
Mazmuny tereń, mán-mańyzy zor jinaq oblystaǵy barlyq mektepter men kolledjderge taratylady.
Foto: Abai oblysy ákimdigi
Foto: Abai oblysy ákimdigi
