Ál-Farabi atyndaǵy Qazaq ulttyq ýniversiteti oqytýshy Gaýhar Dúisembievanyń jumystan bosatylýyna qatysty daýǵa túsinikteme berdi. Ýniversitet ákimshiligi onyń eńbek tártibi men pedagogikalyq ádep talaptaryn buzǵany úshin jumystan shyǵarylǵanyn málimdedi, dep habarlaidy ult.kz «NewTimes.kz» aqparattyq portalyna silteme jasap.
Buǵan deiin áleýmettik jelilerde QazUÝ-dyń filologiia fakýltetinde bolǵan janjal týraly aqparat taraǵan edi. Oqytýshy Gaýhar Dúisembieva ýniversitet ókilderi sabaq ústinde aýditoriiaǵa kelip, stýdentterdiń kózinshe jumystan bosatý týraly buiryqty tapsyrǵanyn aitqan.
Onyń sózinshe, buiryq 2 qazanda shyǵarylǵanymen, qujatty oǵan tek 7 qazanda sabaq kezinde bergen. Sondai-aq oqytýshy qoldardyń qoldan jasalǵanyn jáne ózine dene jaraqaty keltirilgenin málimdegen.
Oqytýshyny ne úshin jumystan shyǵarǵan?
Ýniversitettiń resmi jaýabyna sáikes, Gaýhar Dúisembievamen eńbek qatynastary eńbek tártibi men kásibi pedagogikalyq ádep talaptarynyń buzylýyna qatysty materialdar qaralǵannan keiin toqtatylǵan.
Ákimshiliktiń málimetinshe, oqytýshy stýdentterdi, onyń ishinde kámeletke tolmaǵandardy, oqý protsesine qatysy joq máselelerge tartqan. Atap aitqanda, ýniversitet oqytýshy stýdentterden áleýmettik jelidegi jariialanymdaryna pikir jazýdy surap, qoǵamdyq pikirge yqpal etýge tyrysqan dep málimdedi.
Sondai-aq ýniversitet oqytýshy stýdentter qol qoiǵan qujatty óziniń eńbek daýyna dálel retinde paidalanǵanyn habarlady. Ákimshilik bul qujattyń mazmunyna qatysty kúmán bar ekenin aitqan.
«Stýdentter ózderiniń oqý nátijelerin baǵalaýǵa tikelei yqpal etetin oqytýshyǵa akademiialyq turǵydan táýeldi. Mundai jaǵdaida bilim alýshylardy oqytýshynyń jeke janjaldaryna tartý kásibi pedagogikalyq ádep qaǵidattaryna qaishy keledi», – delingen ýniversitet túsiniktemesinde.
Buiryq nege sabaq ústinde tapsyrylǵan?
QazUÝ málimetinshe, jumystan bosatý týraly buiryq 2 qazanda tártiptik komissiianyń sheshimi negizinde shyǵarylǵan. Oqytýshyǵa komissiia otyrysy týraly aldyn ala habarlanyp, óz ustanymyn bildirýge múmkindik berilgen. Alaida ol otyrysqa qatyspaǵan.
Ýniversitettiń habarlaýynsha, buiryqtyń kóshirmesi Gaýhar Dúisembievanyń turǵylyqty mekenjaiyna EMS Qazpost jedel jetkizý qyzmeti arqyly jiberilgen. Ákimshilik qujatty zańda belgilengen merzimde joldaǵanyn málimdedi.
Ýniversitettiń nusqasy boiynsha, 7 qazanda Dúisembieva endi ýniversitet qyzmetkeri bolmaǵan. Stýdentterdiń sabaq kestesi buzylmaýy úshin kafedra meńgerýshisi onyń ornyna basqa oqytýshyny taǵaiyndaǵan.
Alaida burynǵy qyzmetker aýditoriiaǵa óz betinshe kelip, onyń ornyna sabaq ótkizip jatqan oqytýshydan bólmeden shyǵýdy talap etken. Keiin kadr bóliminiń qyzmetkeri kelip, máseleni dálizde talqylaýdy usynǵan. Biraq ýniversitettiń aitýynsha, Dúisembieva áńgimeni stýdentterdiń kózinshe júrgizýdi talap etken. Ákimshilik oqiǵany stýdentter oqytýshynyń ótinishimen túsirgenin de málimdedi.
«Ýniversitet kadrlyq qujattardy oqý sabaǵy kezinde kópshilik aldynda tapsyrýǵa bastamashy bolǵan joq. Jaǵdai eńbek qatynastary toqtatylǵannan keiin burynǵy oqytýshynyń óz betinshe sabaq ótkizýge kirisýinen týyndady», – dep habarlady QazUÝ.
Zańda ne aitylǵan?
Qazaqstannyń Eńbek kodeksiniń 61-babyna sáikes, jumys berýshi jumystan bosatý týraly buiryqtyń kóshirmesin qyzmetkerge úsh jumys kúni ishinde tapsyrýǵa nemese alǵany týraly habarlamasy bar tapsyrysty hatpen jiberýge mindetti.
Al 65-bap boiynsha, tártiptik jaza qoldanar aldynda jumys berýshi qyzmetkerden jazbasha túsinikteme suratýy kerek. Eger qyzmetker talapty alǵannan keiin eki jumys kúni ishinde túsinikteme bermese, tártiptik jaza qoldanýǵa bolady.
Qol qoiýdy qoldan jasaý jáne uryp-soǵý týraly málimdemelerge ne dedi?
Gaýhar Dúisembieva óz málimdemesinde qoldardyń qoldan jasalǵanyn jáne ózine dene jaraqaty keltirilgenin de aitqan.
QazUÝ ákimshiliginiń túsindirýinshe, bul jaittar 2023–2024 jyldardaǵy oqiǵalarǵa qatysty jáne 2026 jylǵy qazandaǵy jumystan bosatýǵa qatysy joq.
Ýniversitettiń málimetinshe, dene jaraqatyna qatysty oqiǵa eki qyzmetker arasyndaǵy jeke janjal aiasynda bolǵan. Ákimshilik bul daýdyń tarapy emes ekenin jáne oǵan óz betinshe quqyqtyq baǵa bere almaitynyn málimdedi. Oqiǵanyń mán-jaiyn quqyq qorǵaý organdary zerttep, tiisti sheshimder qabyldaǵan.
Al qoldardyń qoldan jasalýy múmkin degen másele, ýniversitettiń habarlaýynsha, sotta qaralǵan.
QazUÝ ókilderi atalǵan eki oqiǵa da qazan aiyndaǵy jumystan bosatý týraly sheshimge negiz bolmaǵanyn atap ótti.
