Tanymal ázilkesh Tursynbek Qabatovtyń burynǵy jary Móldir Muqan tyń týyndysyn kópshilikke usynýǵa daiyndalyp jatyr. Óner iesi belgili aqyn Muhtar Shahanovtyń óleńine án jazyp, shyǵarmashylyǵynda jańa baǵytqa qadam basqanyn málimdedi, dep habarlaidy ult.kz.
Móldir Muqan áleýmettik jelidegi paraqshasynda jańa ánin jazyp shyqqanyn aityp, erekshe áserge bólengenin jetkizdi. Onyń sózinshe, bul týyndy burynǵy shyǵarmalarynan mazmuny men kótergen taqyryby jaǵynan erekshelenedi. Ándi jazý barysynda qýanysh pen qobaljýdy qatar sezingen.
Jańa ánge Muhtar Shahanovtyń ómirlik qiyndyqtarǵa moiymaýǵa, ýaqytsha sátsizdikterdi baqytsyzdyq dep qabyldamaýǵa úndeitin óleńi negiz bolǵan. Ásirese, aqynnyń adamdy jigerlendiretin oilary óner iesine erekshe áser etken.
Móldir Muqannyń pikirinshe, ár adamnyń ómirinde qýanyshty sáttermen qatar qiyndyqtar men sátsizdikter de kezdesedi. Alaida mundai jaǵdailarda ómir toqtap qalǵandai kúi keshpei, kerisinshe, boiǵa kúsh jinap, alǵa umtylý mańyzdy.
Óner iesi burynnan beri bas kóterip, qandai jaǵdai bolsa da alǵa jyljýdy ómirlik ustanymyna ainaldyrǵan. Sondyqtan Muhtar Shahanovtyń jiger beretin óleńin ánge ainaldyrýdy jón kórgen.
Sondai-aq Móldir Muqan týyndyny jazýǵa kirispes buryn aqynnyń otbasymen bailanysqanyn aitty. Ol Muhtar Shahanovtyń ákimshisi men jubaiyna habarlasyp, óleńdi ánge ainaldyrý úshin resmi ruqsat alǵanyn jetkizdi. Buǵan qoldaý bildirgen aqynnyń jaqyndaryna alǵysyn bildirgen.
Ánshi jańa týyndynyń shyǵarmashylyq jolynda erekshe oryn alatynyna senimdi. Onyń aitýynsha, bul án tyńdarmanǵa jiger berip, ómirdiń túrli synaqtaryna tótep berýge úndeidi.
Móldir Muqan aldaǵy ýaqytta jańa ánin kópshilik nazaryna usynýdy josparlap otyrǵanyn aityp, tyńdarmandaryn jańalyǵyn kútýge shaqyrdy.
Aita keteiik, Móldir Muqan densaýlyǵyna qatysty jaisyz habar aitty.
Móldir Muqan kim?
Móldir Muqan – qazaqstandyq prodiýser, ánshi jáne shyǵarmashylyq jobalardy uiymdastyrýshy. Ol kópshilikke tanymal ázilkesh Tursynbek Qabatovtyń burynǵy jubaiy retinde de belgili.
Móldir Muqan uzaq jyldar boiy óner salasynda eńbek etip, kontsertter men túrli shyǵarmashylyq jobalardyń uiymdastyrylýyna atsalysqan. Ol bes balanyń anasy. Sońǵy ýaqytta jeke shyǵarmashylyǵyna kóbirek kóńil bólip, ánshilik qyryn tanytyp júr.
Negizgi mamandyǵy – ekonomist. Joǵary oqý ornyn úzdik diplommen támamdap, 21 jasynan bastap memlekettik qyzmette eńbek etken. Keiin balalarǵa arnalǵan «MM» óner mektebin ashyp, prodiýserlikpen ainalysa bastaǵan. Ánshi Aqtoty Bolyshevamen shyǵarmashylyq bailanysta jumys istegen.
2025 jyly «Shái v bolshom gorode» filminiń prodiýseri boldy. Sondai-aq «Ótirik» jáne «Ómir súr qalma elden» ánderin jaryqqa shyǵardy. 2025 jyly Tursynbek Qabatovpen resmi túrde ajyrasqanyn jariialady.
