"Óner qyrandary" teatrynyń akteri Madiiar Serikbaev sahnada óner kórsetip júrgen sátte anasynan aiyrylǵan. Alaida áriptesteri qaraly habardy oǵan qoiylym aiaqtalǵannan keiin ǵana jetkizgen. Bul týraly Janbolat Naizabekov jýrnalist Aman Tasyǵanǵa bergen suhbatynda baiandady, dep habarlaidy ult.kz.
Akterdiń aitýynsha, sol kúni sahnada erekshe aýyr ári júrek tebirenterlik jaǵdai bolǵan. Madiiar Serikbaev qoiylym barysynda anasynyń ziratyna kelip, keshirim suraǵan uldyń beinesin somdap jatqan. Dál osy sátte onyń ómirinde orny tolmas qaiǵy bolǵanyn áriptesteri estigen.
Janbolat Naizabekovtiń sózinshe, sahnada "Anashym, keshirshi" dep turǵan akter anasynyń ómirden ótkeninen beihabar bolǵan. Qaraly habardy Madiiardyń ápkesi telefon arqyly jetkizgen.
"Madiiar anasynyń qabiriniń basyna kelip turǵan balany oinap jatyr. “Anashym, keshirshi” dep. Osy kezde meniń telefonym shyryldady. Mákeńe ápkesi qońyraý shalyp, “mamadan aiyrylyp qaldyq” dedi. Biz oǵan eki seans boiy eshteńe aitpadyq. Keshki saǵat ondar shamasynda kontsert aiaqtaldy. Sodan keiin Mákeń grimerkaǵa kelip, betin súrtip otyrdy. Ol mundai jańalyqty kútpegen edi", – dep eske aldy Janbolat Naizabekov.
Onyń aitýynsha, Madiiar Serikbaevtyń anasy uzaq ýaqyt syrqattanyp, ómiriniń sońǵy kúnderinde ózdiginen júrip-tura almai qalǵan.
Sol keshte bolǵan jaǵdaidy teatr ujymyndaǵy alty akter bilgen. Alaida olar áriptesterine sýyq habardy qalai jetkizerin bilmei, aýyr kúi keshken. Óitkeni Madiiardyń bul qaiǵyny estigennen keiin sahnaǵa qaita shyǵyp, óner kórsetýi qiyn bolatynyn túsingen.
Sondyqtan akterler qoiylymnyń aiaqtalýyn kútip, kórermen aldyndaǵy baǵdarlamany úzbeýge sheshim qabyldaǵan. Madiiar Serikbaev bolsa, basyna túsken qaiǵydan beihabar kúide sahnadaǵy rólin sońyna deiin oryndaǵan.
Janbolat Naizabekov bul oqiǵany eske alyp, óner adamynyń sahnadaǵy ómiri men jeke basyndaǵy taǵdyry keide osylai aýyr sátte toǵysatynyn jetkizdi.
