"ٶنەر قىراندارى" تەاترىنىڭ اكتەرٸ مادييار سەرٸكباەۆ ساحنادا ٶنەر كٶرسەتٸپ جٷرگەن سەتتە اناسىنان ايىرىلعان. الايدا ەرٸپتەستەرٸ قارالى حاباردى وعان قويىلىم اياقتالعاننان كەيٸن عانا جەتكٸزگەن. بۇل تۋرالى جانبولات نايزابەكوۆ جۋرناليست امان تاسىعانعا بەرگەن سۇحباتىندا باياندادى, دەپ حابارلايدى ult.kz.
اكتەردٸڭ ايتۋىنشا, سول كٷنٸ ساحنادا ەرەكشە اۋىر ەرٸ جٷرەك تەبٸرەنتەرلٸك جاعداي بولعان. مادييار سەرٸكباەۆ قويىلىم بارىسىندا اناسىنىڭ زيراتىنا كەلٸپ, كەشٸرٸم سۇراعان ۇلدىڭ بەينەسٸن سومداپ جاتقان. دەل وسى سەتتە ونىڭ ٶمٸرٸندە ورنى تولماس قايعى بولعانىن ەرٸپتەستەرٸ ەستٸگەن.
جانبولات نايزابەكوۆتٸڭ سٶزٸنشە, ساحنادا "اناشىم, كەشٸرشٸ" دەپ تۇرعان اكتەر اناسىنىڭ ٶمٸردەن ٶتكەنٸنەن بەيحابار بولعان. قارالى حاباردى ماديياردىڭ ەپكەسٸ تەلەفون ارقىلى جەتكٸزگەن.
"مادييار اناسىنىڭ قابٸرٸنٸڭ باسىنا كەلٸپ تۇرعان بالانى ويناپ جاتىر. “اناشىم, كەشٸرشٸ” دەپ. وسى كەزدە مەنٸڭ تەلەفونىم شىرىلدادى. مەكەڭە ەپكەسٸ قوڭىراۋ شالىپ, “مامادان ايىرىلىپ قالدىق” دەدٸ. بٸز وعان ەكٸ سەانس بويى ەشتەڭە ايتپادىق. كەشكٸ ساعات وندار شاماسىندا كونتسەرت اياقتالدى. سودان كەيٸن مەكەڭ گريمەركاعا كەلٸپ, بەتٸن سٷرتٸپ وتىردى. ول مۇنداي جاڭالىقتى كٷتپەگەن ەدٸ", – دەپ ەسكە الدى جانبولات نايزابەكوۆ.
ونىڭ ايتۋىنشا, مادييار سەرٸكباەۆتىڭ اناسى ۇزاق ۋاقىت سىرقاتتانىپ, ٶمٸرٸنٸڭ سوڭعى كٷندەرٸندە ٶزدٸگٸنەن جٷرٸپ-تۇرا الماي قالعان.
سول كەشتە بولعان جاعدايدى تەاتر ۇجىمىنداعى التى اكتەر بٸلگەن. الايدا ولار ەرٸپتەستەرٸنە سۋىق حاباردى قالاي جەتكٸزەرٸن بٸلمەي, اۋىر كٷي كەشكەن. ٶيتكەنٸ ماديياردىڭ بۇل قايعىنى ەستٸگەننەن كەيٸن ساحناعا قايتا شىعىپ, ٶنەر كٶرسەتۋٸ قيىن بولاتىنىن تٷسٸنگەن.
سوندىقتان اكتەرلەر قويىلىمنىڭ اياقتالۋىن كٷتٸپ, كٶرەرمەن الدىنداعى باعدارلامانى ٷزبەۋگە شەشٸم قابىلداعان. مادييار سەرٸكباەۆ بولسا, باسىنا تٷسكەن قايعىدان بەيحابار كٷيدە ساحناداعى رٶلٸن سوڭىنا دەيٸن ورىنداعان.
جانبولات نايزابەكوۆ بۇل وقيعانى ەسكە الىپ, ٶنەر ادامىنىڭ ساحناداعى ٶمٸرٸ مەن جەكە باسىنداعى تاعدىرى كەيدە وسىلاي اۋىر سەتتە توعىساتىنىن جەتكٸزدٸ.
