Qazaqstandyq tanymal ánshi Dimash Qudaibergen GRAMMY stýdiiasynyń jańa «Global Mixtape» jobasyna qatysyp, aldaǵy shyǵarmashylyq josparlary týraly aitty. Óner iesi álemdik týrnesiniń aýqymy burynǵydan da keń bolýy múmkin ekenin jetkizdi, dep habarlaidy ult.kz.

Jýrnalist Valeri Lige bergen suhbatynda Dimash aldaǵy kontserttik saparynyń egjei-tegjeiin ázirge tolyq jariialai almaitynyn jasyrmady. Degenmen ánshi álemniń ondaǵan elinde óner kórsetýdi josparlap otyrǵanyn aitty.

«Bul jańalyqtardy ázirge jariialaýǵa bola ma, oǵan tolyq senimdi emespin. Sondyqtan naqty aita almaimyn, qupiia saqtaýǵa tiispin. Degenmen týr jiyrmadan astam eldi qamtidy. Otyzdan, tipti qyryqtan da kóp bolýy múmkin. Men múmkindiginshe kóp kontsert berip, álemniń barlyq eline barǵym keledi. Óitkeni jankúierlerimmen kezdeskendi jaqsy kóremin», – dedi ánshi.

Dimash suhbat barysynda sheteldik tyńdarmandaryna degen erekshe qurmeti týraly da sóz qozǵady. Onyń aitýynsha, ár memlekette sol eldiń ana tilinde án oryndaý – kórermenge alǵys bildirýdiń bir joly.

Óner iesi mýzyka arqyly túrli ult ókilderin jaqyndastyryp, mádenietter arasyndaǵy bailanysty nyǵaitýdy mańyzdy sanaitynyn jetkizdi.

Qazirgi ýaqytta jariialanǵan kontserttik kestede Polsha, Germaniia, Ispaniia, Meksika, Kolýmbiia, Chili, Perý jáne Indoneziia elderi bar.

Al ánshi aitqan 30-40-tan astam eldi qamtý jospary ázirge tolyq naqtylanbaǵan. 
Aita keteiik, Dimash Qudaibergen Polshadaǵy kontsertinen keiin jankúierlerine alǵys aitty.

Dimash Qudaibergen kim?

Dimash Qudaibergen – qazaqstandyq tanymal ánshi, kompozitor, mýltiaspapshy, halyqaralyq deńgeide óner kórsetip júrgen oryndaýshy. Tolyq aty-jóni – Dinmuhammed Qanatuly Qudaibergen. Ol 1994 jyly 24 mamyrda Aqtóbe qalasynda dúniege kelgen.

Dimash ónerli otbasynda tárbielengen. Ákesi Qanat Aitbaev pen anasy Svetlana Aitbaeva – Qazaqstannyń eńbek sińirgen mádeniet qairatkerleri. Ánshi bala kezinen mýzykaǵa qyzyǵýshylyq tanytyp, kásibi bilim alǵan. Ol Q. Jubanov atyndaǵy Aqtóbe óńirlik ýniversitetinde jáne Qazaq ulttyq óner ýniversitetinde oqyǵan.

2015 jyly Belarýs elinde ótken «Slavian bazary» halyqaralyq baiqaýynda bas júldeni jeńip aldy. Al 2017 jyly Qytaidaǵy «Singer» mýzykalyq jobasyna qatysyp, ekinshi oryn ielendi. Osy baiqaýdan keiin onyń halyqaralyq tanymaldyǵy aitarlyqtai artty.

Dimash keń daýys diapazonymen jáne túrli mýzykalyq janrda án oryndaý sheberligimen erekshelenedi. Onyń repertýarynda qazaq, aǵylshyn, orys, frantsýz, qytai jáne basqa da tilderdegi shyǵarmalar bar. Ánshiniń «Umytylmas kún», «Daididaý», «SOS d’un terrien en détresse» jáne «Stranger» ánderi tyńdarman arasynda keńinen tanylǵan.

Óner iesi AQSh, Qytai, Eýropa jáne Aziia elderinde jeke kontsertterin ótkizip keledi. Onyń jankúierleri ózderin «Dears» dep ataidy. Dimash Qudaibergen halyqaralyq sahnada qazaq tilindegi ánderdi oryndap, ulttyq mádenietti álemge tanytýǵa úles qosyp júr.