Áleýmettik jelide «Haker Atyraý» degen atpen tanylǵan Nurlan Jańbyrbaevqa qatysty sot talqylaýy jalǵasyp jatyr. Ol 12 adamǵa jalpy somasy 13 million teńge kóleminde materialdyq shyǵyn keltirdi degen aiyppen sot aldynda jaýap berýde, dep habarlaidy ult.kz.

32 jastaǵy Nurlan Jańbyrbaevqa alaiaqtyqtyń 12 epizody boiynsha aiyp taǵylǵan. Tergeý málimetinshe, onyń áreketinen 12 azamat zardap shekken.

Sot barysynda aiyptalýshy jábirlenýshilerdiń toǵyzymen esep aiyrysyp, olardyń qarajatyn qaitarǵanyn aitty. Sondai-aq qalǵan shamamen 4 million teńgeni de óteýge daiyn ekenin jetkizdi.

Degenmen ol ózine taǵylǵan aiypty tolyq moiyndamai otyr. Jańbyrbaevtyń sózinshe, ol azamattardyń aqshasyn alaiaqtyq jolmen iemdenbegen.

«Haker Atyraý» qalai tanyldy?

Nurlan Jańbyrbaevtyń esimi Atyraý oblysyndaǵy Jangeldin aýylynda bir otbasynyń tórt múshesiniń joǵalýyna qatysty oqiǵadan keiin kópshilikke keńinen tanyla bastady.

Ol áleýmettik jelidegi paraqshasynda atalǵan oqiǵaǵa qatysty óz betinshe jinaǵan málimetterin jariialap, otbasy músheleriniń joǵalýyna bailanysty oqiǵalar tizbegin taldaǵan.

Keiin Jańbyrbaevtyń ózine qatysty qylmystyq is qozǵaldy. 9 qańtarda tergeý soty ony syrttai qamaýǵa alýǵa sanktsiia berdi. Al 19 aqpanda onyń Túrkiiada ustalyp, Qazaqstanǵa jetkizilgeni belgili boldy.

Alaida memlekettik aiyptaýshy qazirgi sot protsesiniń Jangeldin aýylyndaǵy oqiǵaǵa esh qatysy joq ekenin málimdedi.

Prokýror sottaǵy jaǵdaidy túsindirdi

Memlekettik aiyptaýshy Abylaihan Ábýjanovtyń aitýynsha, Nurlan Jańbyrbaevqa Qylmystyq kodekstiń 190-baby boiynsha birneshe ret alaiaqtyq jasady degen aiyp taǵylǵan.

«Jábirlenýshilerdi jaýaptaý satysyndamyz. Qazir tórt jábirlenýshi qaldy», – dedi prokýror.