Almaty qalasynyń Almaly aýdandyq sotynda Sanjar Boqaev, onyń jieni Madiiar Qalmenov jáne jeke mobilografy Ulan Núsipqojaǵa qatysty qylmystyq is boiynsha kezekti sot otyrysy bastaldy. Sottalýshylarǵa alaiaqtyq jasaý, qylmystyq jolmen alynǵan kiristerdi zańdastyrý, urlyq, aǵashtardy zańsyz kesý jáne kórineý jalǵan aqparat taratý boiynsha aiyptar taǵylǵan.
Sotta kýágerlerden jaýap alý jalǵasyp jatyr. Atap aitqanda, «QazTransGaz» kásipodaǵynyń 42 million teńgeden astam qarajatyn jymqyrýǵa qatysty qarjylyq epizodtar qaralýda.
Buǵan deiingi sot otyrystarynda Boqaevtyń avtokerýen uiymdastyrýdaǵy, merdigerlerdi tańdaýdaǵy jáne bólingen qarjyny basqarýdaǵy onyń róline qatysty birqatar derek aityldy.
«QazTransGaz» AQ-nyń burynǵy bas direktory Rýstam Súleimanovtyń aitýynsha, Boqaev kompaniiada óz betinshe áreket etken. Ol basshylyqpen kelispesten óz betinshe sheshim qabyldap, avtokerýendi uiymdastyrý jumystaryna jeke ózi jetekshilik etken. Al Boqaevty bas direktordyń keńesshisi qyzmetine Qairat Sháripbaevtyń ózi taǵaiyndaǵan. Súleimanovtyń sotta bergen jaýabyna qaraǵanda, kompaniia basshylyǵy aýysqannan keiin de Boqaev burynǵy artyqshylyqtaryn saqtap qalǵan. Ol is júzinde qalyptasqan qyzmettik baǵynystylyq tártibinen tys áreket etip, atqaryp júrgen jumysynyń egjei-tegjeiin jańa basshylyqqa baiandaýdy qajet dep sanamaǵan kórinedi.
Kompaniianyń baspasóz qyzmetiniń burynǵy basshysy Beksultan Qurmanquldyń aitýynsha, Boqaev merdigerlerdi ózi alyp kelip, aldyn ala daiyndalǵan shyǵyn smetalaryn usynǵan. Al kásipodaq komiteti otyrysynyń hattamasyna máseleler is júzinde talqylanbastan, tek formaldy túrde qol qoiylǵan.
Taǵy bir kýáger, «MLS-Group» JShS-niń burynǵy direktory Jarmuhamed Sultanov túsirilmegen derekti film úshin Boqaevqa 12,3 million teńgeni qolma-qol bergenin málimdedi. Onyń sózinshe, jarnamalyq qyzmetter úshin túsken qarajattyń bir bóligi Boqaevtyń jihaz kásibin damytýǵa jumsalǵan.
Buǵan deiin kásipodaqtyń burynǵy tóraiymy Zaýresh Mahanova da merdiger kompaniialardy Boqaevtyń ózi usynǵanyn aitqan bolatyn. Onyń málimdeýinshe, Boqaevtyń jieni kelisimsharttardy aldyn ala ázirlep, tiisti somalaryn kórsetip, qol qoiýǵa daiyn kúiinde ákelip otyrǵan.
