Memleket basshysynyń tapsyrmasyna sáikes Qazaqstanda parasportty damytý jáne múgedektigi bar azamattardyń sportpen shuǵyldanýyna qolaily jaǵdai jasaý baǵytyndaǵy jumystar jalǵasýda. Endi @parasport_kz_bot Telegram-boty arqyly ár adam ózine qolaily sport túrin tańdap, óńirindegi sport sektsiialaryn taýyp, jattyqtyrýshymen bailanysa alady, dep habarlaidy ult.kz.
Jańa tsifrlyq qyzmet múgedektigi bar azamattardyń sportqa qoljetimdiligin arttyryp, jattyǵýdy bastaýyna múmkindik beredi.
QR Týrizm jáne sport ministrliginiń Dene múmkindikteri shekteýli tulǵalarǵa arnalǵan sporttyq daiarlaý ortalyǵy adamnyń densaýlyq jaǵdaiy men turǵylyqty óńirin eskere otyryp, qoljetimdi sport túrlerin tańdaýǵa kómektesetin Telegram-botty iske qosty.
Ony paidalaný úshin turǵylyqty óńirin, sport baǵytyn jáne densaýlyq jaǵdaiyna bailanysty shekteý sanatyn kórsetý jetkilikti. Osy málimetter negizinde bot tańdalǵan óńirde qoljetimdi sport túrleriniń tizimin usynady. Sondai-aq WhatsApp arqyly sport uiymynyń menedjerimen habarlasýǵa, Instagram paraqshasyna ótýge jáne 2GIS qosymshasynan sport mektebiniń mekenjaiyn tabýǵa bolady.
Tsifrlyq qyzmetterdi damytý – parasportty memlekettik qoldaýǵa baǵyttalǵan keshendi sharalardyń bir bóligi. 2025 jyly alǵash ret zańnamalyq deńgeide I toptaǵy múgedektigi bar sportshylardy alyp júretin adamdardyń mártebesi bekitilip, olardyń halyqaralyq jarystarǵa qatysýyn qarjylandyrý kózdeldi.
Qazaqstandyq parasportshylardyń jetistikteri júieli qoldaýdyń nátijesin kórsetip otyr. 2026 jyly ótken V Aziia Para oiyndarynda Qazaqstan quramasy 12 altyn, 16 kúmis jáne 22 qola medal jeńip alyp, jalpykomandalyq esepte toǵyzynshy orynǵa turaqtady. Osylaisha ulttyq qurama 2023 jylǵy oiyndarda qol jetkizgen nátijesin jaqsartty. Ol kezde qazaqstandyq parasportshylar segiz altyn medal ielengen bolatyn.
Taǵy bir aitýly jetistik – Erbol Hamitovtyń 2026 jyly Italiiada ótken qysqy Paralimpiada oiyndaryndaǵy jeńisi. Ol parabiatlonnan altyn, al parashańǵy jarysynan qola medal jeńip aldy. Sonymen qatar Tokioda ótken XXV jazǵy Sýrdlimpiada oiyndarynda Qazaqstan quramasy segiz altyn, tórt kúmis jáne 13 qola medalǵa qol jetkizip, el qorjynyna barlyǵy 25 júlde saldy.
Joǵary jetistikter sportymen qatar, múgedektigi bar azamattardy dene shynyqtyrýmen jáne sportpen turaqty ainalysýǵa tartýǵa erekshe kóńil bólinýde. Búginde Qazaqstanda 21 myńnan astam múgedektigi bar adam sportpen turaqty túrde shuǵyldanady. Elimizde paralimpiadalyq, sýrdlimpiadalyq jáne paralimpiadalyq baǵdarlamaǵa kirmeitin sport túrlerin qosa alǵanda, 35 sport túri damyp keledi.
Múgedektigi bar adamdarǵa arnalǵan sportty damytý tek halyqaralyq jarystardaǵy jetistiktermen shektelmeidi. Sportpen júieli ainalysý densaýlyqty nyǵaitýǵa, qoǵam ómirine belsendi aralasýǵa, qarym-qatynas aiasyn keńeitýge jáne ómir sapasyn jaqsartýǵa yqpal etedi. Al qoljetimdi sporttyq orta qalyptastyrý jańa talanttardy anyqtaýǵa jáne elimizdiń sporttyq rezervin tolyqtyrýǵa jol ashady.
Telegram-bottyń iske qosylýy – osy baǵyttaǵy jumystyń kezekti qadamy. Jańa qyzmet sportpen ainalysýǵa nietti azamattarǵa qajetti aqparatty bir jerden alýǵa, ózine qolaily sektsiiany jyldam tabýǵa jáne sport uiymymen tikelei bailanysýǵa múmkindik beredi.
