29 qazanda Erlan Qoshanovtyń tóraǵalyǵymen Qazaqstan Halyq Keńesi Tóralqasynyń keńeitilgen otyrysy ótti. Jiynnyń negizgi taqyryby – Memleket basshysynyń «Jańa tarihi kezeńdegi Qazaqstannyń ózekti mindetteri» atty Qazaqstan halqyna Joldaýynda aitylǵan mindetterdi iske asyrý, dep habarlaidy ult.kz.
Otyrysty ashqan Erlan Qoshanov Prezidenttiń halyqqa Joldaýy tereń mazmundy, tujyrymdamalyq máni bar qujat ekenin atap ótti. Onda Qazaqstannyń bolashaǵy, jańa álemdik tártiptegi orny jáne aldaǵy jyldardaǵy damý baǵyty aiqyndalǵan.
Tóraǵanyń pikirinshe, biylǵy Joldaý el damýynyń aýqymdy paiymy men strategiialyq tásilimen erekshelenedi. Memleket basshysy Qazaqstannyń aldynda turǵan mindetterdi jahandyq ózgeristerdi, jańa tehnologiialyq bolmysty jáne eldiń odan ári damýyn aiqyndaityn zamanaýi syn-qaterlerdi eskere otyryp qarastyrady.
Ol sondai-aq Memleket basshysynyń bastamalaryn iske asyrý Qazaqstan Halyq Keńesi músheleriniń belsendi qatysýyn jáne naqty nátijeler úshin jeke jaýapkershilikti talap etetinin atap ótti. Sondyqtan basym baǵyttardy aiqyndap, jalpyulttyq maqsattarǵa qol jetkizýge qosatyn óz úlesin naqty túsiný asa mańyzdy.
El damýynyń uzaq merzimdi baǵdarlaryn qalyptastyrý maqsatymen Qazaqstandyq qoǵamdyq damý institýtymen birlesip, jyl saiynǵy baiandama daiyndaý josparlanyp otyr. Bul baiandama óńirlerden kelip túsken bastamalardy jinaqtaýǵa, azamattardy tolǵandyratyn ózekti máselelerdi aiqyndaýǵa jáne elimizdiń strategiialyq qujattaryn ázirleýge arnalǵan usynystar qalyptastyrýǵa múmkindik beredi.
Bul jumysqa otandyq jetekshi sarapshylar men ǵylymi qoǵamdastyq ókilderi, sonyń ishinde Erkin Ábil, Aigúl Sádýaqasova, Botagóz Rakisheva jáne Nailia Muhtarova tartylady.
Qatysýshylar jańa Azamattyq kodeksti ázirleý máselesine de erekshe nazar aýdardy. Erlan Qoshanov qujatty daiyndaý jumysyna azamattyq qoǵamnyń keńinen qatysýy qajet ekenin atap ótti. Onyń aitýynsha, jańa Kodeks zamanaýi talaptarǵa sai bolyp, halyqtyń ártúrli sanattarynyń múddelerin eskerýi tiis.
Bul jumysqa belgili zańger ǵalymdar Isidor Borchashvili, Mádi Myrzaǵaraev jáne Andrei Lýkindi de tartý usynyldy.
Halyqtyń tsifrlyq daǵdylaryn damytý máselesine de erekshe nazar aýdaryldy. Azamattardyń praktikalyq tsifrlyq daǵdylaryn qalyptastyrýǵa baǵyttalǵan aýqymdy bilim berý jobasyn iske qosý usynyldy. Aýyl turǵyndaryna marketpleister men internet-platformalar arqyly taýar satýdy úiretý, al jastarǵa jeke kásip ashý úshin tsifrlyq quraldardy paidalanýdy meńgertý josparlanyp otyr.
Óńirlerdegi jumysqa da basymdyq berildi. Jyl boiy Qazaqstan Halyq Keńesi ákimdiktermen, qoǵamdyq keńestermen jáne úkimettik emes uiymdarmen kezdesýler ótkizýdi josparlap otyr. Kezdesýlerdiń negizgi maqsaty – halyqty tolǵandyratyn ózekti máselelerdi anyqtaý, olardy sheshý joldaryn izdestirý jáne Halyq Keńesiniń kelesi sessiiasyna naqty zańnamalyq ári praktikalyq usynystar ázirleý.
Qazaqstan Halyq Keńesi músheleriniń jumys tiimdiligin arttyrý jáne bastamalardyń iske asyrylýyn baqylaý maqsatynda Hatshylyq biryńǵai tsifrlyq platforma ázirlep jatyr. Bul júie qajetti aqparatty, qujattardy qaraý barysyn jáne olardyń aǵymdaǵy mártebesin jedel baqylaýǵa múmkindik beredi. Paidalanýshylarǵa qolaily bolý úshin usynystar berýdiń biryńǵai nysany engiziledi. Platformany ázirleý jumysyna Baǵdat Mýsin, Ádilhan Qopabaev jáne Jandos Aqtaev tartyldy.
Otyrys barysynda Qazaqstan Halyq Keńesiniń músheleri, qoǵamdyq keńester men qoǵamdyq uiymdardyń ókilderi de sóz sóilep, salalyq jobalardy iske asyrý boiynsha óz usynystaryn ortaǵa saldy.
Qazaqstan Halyq Keńesiniń músheleri Nurtai Sabilianov pen Vera Kim óńirlerde «Halyqtyq qurylys» baǵdarlamasyn iske asyrýǵa qatysty usynystaryn aitty. Olar jol qurylysy, tsifrlandyrý máselelerine jáne qala men aýyl arasyndaǵy alshaqtyqty qysqartýǵa baǵyttalǵan sharalarǵa erekshe nazar aýdardy.
Infraqurylym taqyrybyn jalǵastyra otyryp, Qostanai avtomobil kóligi kolledjiniń direktory Dmitrii Pavlenko «Halyqtyq qurylys» baǵdarlamasynyń jumyspen qamtý salasyna da oń áserin tigizip otyrǵanyn atap ótti. Baǵdarlamany iske asyrý tehnikalyq jáne kásiptik bilimge degen suranysty edáýir arttyryp, bilikti mamandardyń uzaq merzimdi jumyspen qamtylýyna múmkindik beredi.
Jumystyń taǵy bir mańyzdy baǵyty retinde Tóralqa músheleri Bekmurat Júsipov pen Erkin Ábildiń usynystary aityldy. Olar jobalardyń iske asyrylý barysyna turaqty qoǵamdyq baqylaý júrgizý qajettigine toqtaldy. Olardyń pikirinshe, bul jumysqa beiindi sarapshylardy tartý ashyqtyqty qamtamasyz etip, josparlanǵan jumystardyń sapaly ári ýaqtyly oryndalýyna múmkindik beredi. Atap aitqanda, azamattar jobalardyń iske asyrylý merzimderi men barysy, oǵan qatysýshylar jáne bólinetin qarjy qarajaty týraly habardar bolady.
Otyrys barysynda inkliýzivti ortany damytý máseleleri de qozǵaldy. Bul saladaǵy ózekti mindetter týraly jeke tájiribesine súiene otyryp, belgili parasportshy, Astana qalasy Qoǵamdyq keńesiniń múshesi Ardaq Otorbaev baiandady. Onyń aitýynsha, sońǵy jyldary memleket tarapynan bul máselege aitarlyqtai kóńil bólinip, azamattardyń tolyqqandy ómir súrýine, sportpen ainalysýyna jáne ózin-ózi damytýyna jaǵdai jasalýda.
Tóralqa otyrysynda aitylǵan barlyq bastamalar memlekettik organdarmen birlesip qosymsha pysyqtalyp, aldaǵy kezeńge arnalǵan Halyq Keńesiniń keshendi jumys josparyna engiziletini atap ótildi.
