Qazaqstanda segiz zamanaýi perinataldy ortalyq pen jeti kópbeiindi balalar aýrýhanasy salynady. Sonymen qatar kelesi jyldyń 1 qańtarynan bastap ýchaskelik qyzmet mamandarynyń jalaqysy 40 paiyzǵa deiin artyp, eń tómengi jalaqy 100 myń teńgege kóteriledi. Bul týraly Prezident Qasym-Jomart Toqaev málimdedi, dep habarlaidy ult.kz.
Qazaqstanda segiz zamanaýi perinataldy ortalyq pen jeti kópbeiindi balalar aýrýhanasy salynady. Sonymen qatar kelesi jyldyń 1 qańtarynan bastap ýchaskelik qyzmet mamandarynyń jalaqysy 40 paiyzǵa deiin artyp, eń tómengi jalaqy 100 myń teńgege kóteriledi. Bul týraly Prezident Qasym-Jomart Toqaev málimdedi.
Memleket basshysy elimizde balalar sany jeti millionǵa jýyqtaǵanyn, bul jalpy halyqtyń 34 paiyzy ekenin atap ótti. Onyń aitýynsha, jyl saiyn 330 myńnan astam sábi dúniege keledi. Sondyqtan densaýlyq saqtaý infraqurylymyn júieli ári jedel damytý mańyzdy mindetke ainalyp otyr.
«Biz aýqymdy qurylystyń alǵashqy kezeńinde elimiz boiynsha segiz zamanaýi perinataldy ortalyq salýdy josparlap otyrmyz», – dedi Prezident.
Budan bólek, Atyraý, Aqtóbe, Almaty, Shymkent, Qaskeleń, Semei jáne Aqtaý qalalarynda jeti kópbeiindi balalar aýrýhanasy, al Astanada taǵy eki meditsinalyq nysan boi kótermek.
Qasym-Jomart Toqaev bul jobalardy júzege asyrý úshin biýdjet qarajatymen qatar, jeke kapitaldy da keńinen tartý qajettigin aitty. Sondai-aq memleket pen jekemenshik seriktestigi aiasyndaǵy jobalardy tiimdi iske asyryp, qajetti rásimderdi negizsiz sozbai, sheshimderdi jedel qabyldaýdy tapsyrdy.
Prezident alǵashqy meditsinalyq-sanitarlyq kómek júiesin jańǵyrtýǵa da erekshe mán beriletinin jetkizdi. Onyń sózinshe, jalpy praktika dárigerleriniń ókilettigin keńeitip, bul baǵyttaǵy qarjylandyrý kólemin kezeń-kezeńimen arttyrý mańyzdy.
«Úkimetke keler jyldyń 1 qańtarynan bastap osy baǵytta jumys isteitin ýchaskelik qyzmet mamandarynyń jalaqysyn úzdiksiz eńbek ótiline qarai 40 paiyzǵa deiin arttyrýdy tapsyramyn. Bul 77 myńnan astam mamannyń tabysyn ósirýge múmkindik beredi», – dedi Memleket basshysy.
Sonymen qatar Prezident eń tómengi jalaqy mólsherin 85 myń teńgeden 100 myń teńgege deiin kóterýdi tapsyrdy. Bul ózgeris kelesi jyldyń 1 qańtarynan bastap júzege asyrylýǵa tiis.
«Bul 1,8 million adamnyń, sonyń ishinde biýdjetten jalaqy alatyn 370 myńnan astam qyzmetkerdiń tabysyn arttyrýǵa yqpal etedi», – dep atap ótti Qasym-Jomart Toqaev.
Osylaisha, aldaǵy kezeńde balalar densaýlyǵyn qorǵaý infraqurylymyn keńeitý, alǵashqy meditsinalyq kómekti jetildirý jáne halyq tabysyn arttyrý baǵytynda birqatar ózgeris júzege asyrylmaq.
