Prezident Qasym-Jomart Toqaev salyq saiasatyn jetildirý qajettigin aityp, Úkimetke biznes ókilderiniń usynystaryn eskere otyryp, salyq zańnamasyna naqty ózgerister engizýdi tapsyrdy, dep habarlaidy ult.kz.
Memleket basshysynyń aitýynsha, jańa Salyq kodeksi búkil júieni keshendi túrde jańǵyrtýǵa negiz qalaǵanymen, aýqymdy reformany júzege asyrý barysynda aldyn ala boljaý qiyn máseleler týyndaǵan. Sonyń saldarynan kásipkerler jekelegen normalardy qoldaný kezinde qiyndyqtarǵa tap bolyp otyr.
«Salyq kodeksi – dogma emes, qasietti jazba da emes. Ol shynaiy ómirden alshaq bolmaýǵa tiis», – dedi Qasym-Jomart Toqaev.
Prezidenttiń pikirinshe, zańnamadaǵy qaishylyqtardy joiyp, normalardyń ekiushty túsindirilýine jol bermeý qajet. Sondai-aq kásipkerlerge túsetin negizsiz salmaq pen júiedegi olqylyqtardy retteý mańyzdy.
Memleket basshysy salyq júiesi biznestiń damýyna yntany tómendetpeýge, investitsiia tartýǵa jáne jańa jumys oryndaryn ashýǵa kedergi keltirmeýge tiis ekenin atap ótti.
Osyǵan bailanysty Úkimetke biznes ókilderiniń pikirine qulaq asyp, salyq zańnamasyna núkteli ózgerister engizý jóninde usynystar ázirleý mindeti júkteldi.
«Muny jan-jaqty oilastyryp, ár joly kásipkerlerdiń jumys isteý erejelerin ózgerte bermeitindei etip jasaý kerek. Bizdiń zańnamamyzdyń tym kúrdeli ári túsinýge qiyn bolǵany sonshalyq, ol kásipkerler úshin naǵyz bas aýrýyna ainaldy», – dedi Prezident.
Qasym-Jomart Toqaev salyq zańnamasyndaǵy ózgerister kásipkerlik ortaǵa túsinikti ári boljamdy bolýy kerektigin atap ótti.
