Jambyl oblysynyń Sarysý aýdanynda kommýnaldyq kásiporyn zań talaptaryn buzyp, kásipkerlerge injenerlik jelilerge qosylýǵa qajetti tehnikalyq sharttardy úsh jyldyń ornyna bir jylǵa ǵana berip kelgen. Sonyń saldarynan iri investor men taǵy 26 kásipker artyq áýre-sarsańǵa túsken, dep habarlaidy ult.kz.
Jambyl oblystyq prokýratýrasynyń málimetinshe, zańbuzýshylyq tabiǵi monopoliia sýbektileriniń qyzmetin tekserý kezinde anyqtalǵan. Tehnikalyq sharttardy qysqa merzimge rásimdegen «Jańatas-Sý-Jylý» kommýnaldyq memlekettik kásiporny.
Osy jaǵdaiǵa tap bolǵandardyń biri 2023 jyldan beri mineraldy tyńaitqysh óndirý jobasyn júzege asyryp kele jatqan «Evrohim» JShS. Investor sý, jylý jáne káriz júielerine qosylýǵa arnalǵan qujattaryn jyl saiyn qaita rásimdeýge májbúr bolǵan.
Ár rásimdeý jumysy 15 kúntizbelik kúnge deiin sozylǵan. Prokýratýranyń baǵalaýynsha, mundai talap kásipkerlerge negizsiz ákimshilik kedergiler týǵyzyp, olardyń jumysyn qiyndatqan.
Prokýratýra aralasqannan keiin investor men taǵy 26 kásipkerdiń tehnikalyq sharttary zań talaptaryna sáikes úsh jyl merzimge qaita rásimdeldi. Zańbuzýshylyqqa jol bergen laýazymdy tulǵa tártiptik jaýapkershilikke tartyldy.
