Qazaqstannyń halyq ártisi, tanymal aktrisa Merýert Ótekeshova qazaqtyń bulbuly Bibigúl Tólegenova týraly estelikterimen bólisti. Óner iesi ózin kópshiliktiń áigili ánshige jii uqsatatynyn aityp, oǵan degen erekshe qurmetin jetkizdi, dep habarlaidy ult.kz.
Aktrisa "Qazaqstan" ulttyq arnasyndaǵy "Tańsholpan" baǵdarlamasyna qonaq bolyp, Bibigúl Tólegenovanyń ónerdegi orny men ómir jolyna toqtaldy.
Merýert Ótekeshovanyń aitýynsha, ol mektep qabyrǵasynda júrgen kezinen-aq ánshiniń erekshe daýysyn súisine tyńdaǵan. Radiodan shyrqalǵan ánderi áli kúnge deiin esinde saqtalǵan.
"Mektepte oqityn kezimizde Bibigúl apaidyń daýysyn radiodan estitinbiz. Daýysy eshkimge uqsamaidy, syńǵyr-syńǵyr. Biraz jasqa kelse de daýysy bar, el syilaidy. Ol kisi jas kezinen qiynshylyq kórdi. Zaýytta jumys istegen. Sol kezde birneshe jyldan keiin ol kisiniń osyndai tanymal ánshi bolaryn eshkim bilmedi", – dedi aktrisa.
Óner iesi Bibigúl Tólegenovanyń tanymaldylyqqa jetý joly ońai bolmaǵanyn atap ótti. Onyń sózinshe, ánshi eńbek jolyn zaýytta bastaǵanymen, erekshe daýysynyń arqasynda óner álemine jol ashqan.
Aktrisa ánshiniń tabiǵi daryny kezinde mamandardyń nazaryn aýdaryp, konservatoriiada bilim alýyna múmkindik týǵanyn da eske aldy.
Sondai-aq Merýert Ótekeshova kópshiliktiń ózin Bibigúl Tólegenovaǵa uqsatatynyn jasyrmady.
"Meni kópshilik apamyzǵa uqsatyp jatady. Bir jaǵynan oǵan qýanamyn", – dedi ol.
Aktrisanyń bul sózi onyń áigili ánshige degen qurmetin ańǵartty.
Aita keteiik, Bibigúl Tólegenova – qazaq opera óneriniń kórnekti ókili, KSRO halyq ártisi. Al Merýert Ótekeshova kórermenge "Qyz Jibek" filmindegi basty róli arqyly keńinen tanylǵan.
Merýert Ótekeshova kim?
Merýert Qarataiqyzy Ótekeshova – qazaqtyń belgili teatr jáne kino aktrisasy, Qazaqstannyń halyq ártisi. Ol 1951 jyly 25 aqpanda Oral qalasynda dúniege kelgen.
1968 jyly Almatydaǵy №66 mektepti bitirip, áigili "Qyz Jibek" filminiń basty róline tańdalǵan. Osy týyndydaǵy Jibek beinesi arqyly búkil qazaq halqyna tanyldy. 1969–1973 jyldary Qurmanǵazy atyndaǵy memlekettik óner institýtynda KSRO halyq ártisi Hadisha Bókeevadan bilim alǵan. 1973 jyldan bastap Muhtar Áýezov atyndaǵy Qazaq ulttyq drama teatrynda eńbek etti.
Teatr sahnasynda "Ana – Jer-ana", "Qaragóz", "Eńlik – Kebek" jáne basqa da qoiylymdarda basty rólderdi somdady.
1982 jyly Qazaq KSR-niń eńbek sińirgen ártisi ataǵyn aldy.
Ónerdegi eńbegi úshin 2008 jyly "Qurmet", 2017 jyly "Parasat" ordenderimen marapattaldy.
Aktrisa marqum akter Quman Tastanbekovpen otbasyn quryp, Jibek, Tomiris jáne Farabi esimdi úsh bala tárbielep ósirgen.
