Tanymal ánshi ári aktrisa Aigúl Imanbaeva qyzdardyń turmysqa shyǵý jasyna qatysty qoǵamda qalyptasqan kózqarastar týraly pikir bildirdi. Óner iesi árbir áieldiń otbasyn qurý men ana ataný máselesinde óz tańdaýyn jasaýǵa quqyly ekenin aitty, dep habarlaidy ult.kz.
Ánshi áleýmettik jelidegi paraqshasynda qyz balalardyń belgili bir jasqa kelgende mindetti túrde turmysqa shyǵýy kerek degen túsinikpen kelispeitinin jetkizdi. Onyń pikirinshe, qoǵamnyń nemese ainalasyndaǵy adamdardyń qysymy áieldiń jeke ómirine qatysty sheshim qabyldaýyna áser etpeýi tiis.
Aigúl Imanbaeva ásirese boijetkenderdiń jasyna bailanysty aitylatyn orynsyz pikirlerge toqtaldy. Ol qyz 18 jasqa tolǵannan bastap turmysqa shyǵý máselesi jii qozǵalyp, 25 jasqa kelgende ainalasyndaǵylardyń alańdaýshylyǵy kúsheietinin atap ótti.
"Qyzdyń qashan turmysqa shyǵatynyn, qashan ana atanatynyn qoǵamdaǵy jalpy pikir emes, qyzdyń ózi sheshedi. Sebebi bizdiń qoǵamda bir qalyptasqan stereotip bar. Qyz on segizge kelse: “Nege bul kúieýge timeidi?” deidi. Jiyrma beske kelse: “Oibai, myna qyzym qartaidy, qashan teńin tabady?” dep jatady", – dedi óner iesi.
Aktrisa mundai pikirlerdiń qyzdardyń erkin tańdaý jasaýyna kedergi keltiretinin aityp, ata-analar men qoǵam ókilderin qalyptasqan túsinikke basqasha qaraýǵa shaqyrdy.
"“Kárisiń” degen de bir stereotip bar. Ata-ana bolsyn, qoǵamnyń pikiri bolsyn, meniń jeke kózqarasym boiynsha, bul durys emes", – dep túiindedi ánshi.
Aigúl Imanbaevanyń jazbasy áleýmettik jelide qyzý talqylandy. Pikir bildirýshilerdiń bir bóligi onyń kózqarasyn qoldap, qyz balanyń aldymen bilim alyp, kásibi jáne tulǵalyq turǵydan damýyna múmkindik berý qajet ekenin jazdy.
"Durys aitasyz! Qyzymnyń jasy 24-te. Jan-jaqtylarym “turmysqa ber” dep maza bermeidi. Oqysyn, toqysyn, ári qarai damysyn!" – dep jazdy jeli qoldanýshylarynyń biri.
Taǵy bir oqyrman qyzdardyń otbasyn qurýǵa asyqpaýy kerektigin aityp, 25–28 jasta turmysqa shyǵýdy qalypty jaǵdai dep sanaitynyn jetkizgen.
Osylaisha, ánshiniń pikiri áleýmettik jelide áielderdiń jeke tańdaýy, nekege turý jasy jáne qoǵamnyń qyz balalarǵa qoiatyn talaptary týraly talqylaýǵa ulasty.
Aigúl Imanbaeva kim?
Aigúl Serikqulqyzy Imanbaeva – qazaqstandyq tanymal ánshi, aktrisa, telejúrgizýshi jáne Qazaqstannyń eńbek sińirgen qairatkeri. Ol 1977 jyly 15 naýryzda Jambyl oblysy Qordai aýdanyndaǵy Kenen aýylynda dúniege kelgen.
Bala kezinen ónerge qyzyǵýshylyq tanytyp, mýzyka mektebinde baian aspabyn meńgergen. 1994 jyly Temirbek Júrgenov atyndaǵy Qazaq ulttyq óner akademiiasyna túsip, 1998 jyly oqýyn aiaqtaǵan.
Eńbek jolyn Júsipbek Elebekov atyndaǵy estradalyq-tsirk kolledjinde oqytýshy bolyp bastaǵan. Keiin Ǵabit Músirepov atyndaǵy Qazaq memlekettik akademiialyq balalar men jasóspirimder teatrynda aktrisa retinde qyzmet atqarǵan. 2001 jyly "Habar" telearnasyndaǵy "Uiat bolmasyn" baǵdarlamasyna qatysyp, kópshilikke keńinen tanyldy.
2004 jyly halyqaralyq "Aziia daýysy" baiqaýynyń "Qazaq ánderi" atalymynda bas júldeni jeńip aldy. 2006 jyly "Daryn" memlekettik jastar syilyǵynyń laýreaty atanyp, 2011 jyly Almatyda óziniń "A.I" teatryn ashty. Al 2015 jyly óner salasyna qosqan úlesi úshin "Qazaqstannyń eńbek sińirgen qairatkeri" qurmetti ataǵyna ie boldy.
