"Óner qyrandary" teatrynyń akteri Janbolat Naizabekov shańyraq kótergen kúni basynan ótken aýyr jaǵdaidy alǵash ret kópshilikke baiandady. Óner iesi jol apatynan áieliniń eń jaqyn qurbysy qaza taýyp, josparlanǵan úilený toiy ótpei qalǵanyn aitty, dep habarlaidy ult.kz.
Akter bul oqiǵany jýrnalist Aman Tasyǵanǵa bergen suhbatynda eske aldy. Onyń aitýynsha, úilený toiy bolatyn kúni olar jol apatyna ushyraǵan. Qaiǵyly jaǵdaiǵa nebári 20 minýt qalǵanda jubaiy Ińkárdiń jaqyn qurbysy Janbolattan kóliktegi ornyn aýystyrýdy ótingen. Alaida kóp uzamai bolǵan jol apatynan boijetken kóz jumǵan.
Janbolat Naizabekov úshin eń aýyr sátterdiń biri qaraly habardy marqumnyń ata-anasy men óz jubaiyna jetkizý bolǵan. Apat kezinde Ińkárdiń ózi de aýyr jaraqat alyp, kóp qan joǵaltqan. Sondyqtan akter oǵan qurbysynyń qazasyn birneshe kún boiy aitpaǵan.
"Eń qiyny – ata-anasyna, meniń kelinshegime estirtý boldy. Kelinshegime eki-úsh kúndei ótirik aittym. Óitkeni meniń kelinshegimniń artqy lovovoi basyn jyrtyp jibergen. Qan toqtaǵan joq. Kinolarda toi kóilektiń qyp-qyzyl qan bolatynyn. Týra sondai boldy", – dedi akter.
Osy oqiǵadan keiin óner iesiniń otbasy úlken kúizeliske túsken. Ásirese, eń jaqyn qurbysynan aiyrylǵan Ińkárge qaiǵyny eńserý ońai bolmaǵan. Akterdiń sózinshe, jubaiy uzaq ýaqyt depressiialyq kúide júrgen.
Qaiǵyly jaǵdaidan soń erli-zaiypty aýyldan ketip, Almatyǵa qonys aýdarýdy uiǵarǵan. Jańa qalada ónerdegi áriptesteri olarǵa qoldaý kórsetip, qiyn kezeńnen ótýine kómektesken.
"Ata-anasymen júzdestik, keshirim suradyq. Óte qiyn boldy. Taǵdyr solai bolyp tur endi. Basyna bardyq, Quran oqydyq. Ińkár ózin ustai almady. Úlken jara bolyp qaldy. Arada qansha jyl ótti, esh jerde aitpaǵanmyn. Aitqym da kelmedi", – dep bólisti Janbolat Naizabekov.
Akter sol kúni úilený toiyna 400 adam shaqyrylǵanyn da aitty. Dastarhan jaiylyp, Almatydan óner adamdary arnaiy kelgenimen, kútpegen qaiǵyly jaǵdaiǵa bailanysty merekelik shara toqtatylǵan.
"Áielim qansyrap jatty. Men sotriasenie dalada júrmin. Kelgen qonaqtarym ne isterin bilmei jatyr. Jigitterge Alla razy bolsyn, bárin shyǵaryp saldy. 400 adamǵa dastarhan jaiylǵan. Úlken toihana. Almatydan qanshama ártis kelgen", – dedi ol.
Arada biraz ýaqyt ótken soń otbasy jaqyn týystarynyń qatysýymen shaǵyn betashar rásimin ótkizgen. Alaida úlken úilený toiy sol kúii uiymdastyrylmaǵan.
Janbolat Naizabekov jyldar boiy júreginde saqtap kelgen bul oqiǵany aitýǵa qinalǵanyn jetkizdi. Soǵan qaramastan akter bolashaqta jubaiymen birge kópten beri ótpei qalǵan toiyn jasaýy múmkin ekenin jasyrmady.
Janbolat Naizabekov kim?
Janbolat Naizabekov – qazaqstandyq akter, prodiýser jáne "Óner qyrandary" ázil-syqaq teatry arqyly kópshilikke tanylǵan óner iesi. Ol 1988 jyly Atyraý oblysy Jylyoi aýdanyndaǵy Qulsary qalasynda dúniege kelgen.
Jastaiynan akter bolýdy armandaǵan ol Almatydaǵy Temirbek Júrgenov atyndaǵy Qazaq ulttyq óner akademiiasyna oqýǵa túsýge talpynǵan.
Óner jolynda "Óner qyrandary" teatrynyń quramynda 15 jyl qyzmet etip, túrli qoiylymdarda óner kórsetti.
Keiin kino salasyna bet buryp, akterlikpen qatar prodiýserlik jumysty da qolǵa aldy. 2023 jyly óziniń "Coco & Janbo" atty filmin kórermenge usyndy.
Óner iesi suhbattarynyń birinde kino túsirýdi on jyl boiy armandaǵanyn aitqan.
Ol "ToiHana", "Ajyrasam" jáne "Bolǵan oqiǵa" sekildi filmderge túsken.
Akterdiń jubaiynyń esimi – Ińkár, ekeýi bes ul tárbielep otyr.
Janbolat Naizabekov áleýmettik jelide de belsendi bolyp, shyǵarmashylyǵy men otbasylyq ómirine qatysty jańalyqtardy kópshilikpen bólisip keledi
