Qazaqstandyq shoý-biznes ókilderi arasynda jubaiyna qymbat avtokólik syilaý tańsyq jaǵdai emes. Biri jarynyń týǵan kúnine tosynsyi jasasa, endi biri otbasylyq merekege orai sý jańa temir tulpar tartý etken. Tipti quny 100 million teńgeden asatyn kólik syilaǵan tanymal azamattar da bar, dep habarlaidy ult.kz.
Sońǵy jyldary otandyq óner ókilderi otbasyndaǵy qýanyshty sátterin áleýmettik jeli arqyly jii bólisetin boldy. Ásirese jubailaryna avtokólik syilaǵan ánshiler men tanymal tulǵalardyń beinejazbalary jeli qoldanýshylarynyń nazaryn aýdaryp keledi.
Osy oraida jaryna baǵaly kólik syilaǵan qazaqstandyq juldyzdarǵa toqtalaiyq.
Serik Ibragimov – 100 million teńgelik avtokólik
2025 jyldyń qańtarynda tanymal ánshi Serik Ibragimov pen jubaiy Ainamkóz Ábdimaeva jańa avtokólikterin kópshilikke kórsetti.
Ánshiniń jary áleýmettik jelidegi paraqshasynda otbasylaryna birden eki kólik alǵandaryn jariialaǵan. Erli-zaiypty aq jáne qara tústi temir tulparlarymen sýretke túsken.
Keiin Serik Ibragimov jýrnalisterdiń kólik baǵasyna qatysty suraǵyna jaýap berip, óziniń avtokóligi 100 million teńge turatynyn aitqan. Bul jait kópshiliktiń nazaryn aýdaryp, shoý-biznes ókilderiniń qymbat kólik satyp alýy áleýmettik jelide talqylanǵan.
Tóreǵali Tóreáli – Lexus RX 300
Belgili ánshi Tóreǵali Tóreáli de jubaiy Tolqyn Turarbekqyzyn baǵaly syilyqpen qýantqan.
Óner iesi jaryna Lexus RX 300 avtokóligin tartý etken.
Ánshiniń aitýynsha, bul kóliktiń olardyń otbasylyq ómirinde ózindik orny bar. Tóreǵali men Tolqyn qyz-jigit bolyp júrgen ýaqytta da bolashaq jary dál osyndai modeldegi avtokólikti mingen eken. Sondyqtan ánshi bul joly da jubaiyna estelikterimen bailanysty temir tulpar syilaýdy jón kórgen.
Ábdijappar Álqoja – týǵan kúnge tosynsyi
2023 jyly ánshi Ábdijappar Álqoja jubaiynyń týǵan kúnine erekshe syilyq daiyndaǵan.
Óner iesi dostarymen birge jaryna gúl shoqtaryn usynyp, keiin avtokólik tartý etken.
Ánshi bul qýanyshty sáttiń otbasyn qurǵandaryna toǵyz jyl tolýymen de bailanysty ekenin jetkizgen.
Ábdijappar buǵan deiin jumysbastylyq saldarynan jarynyń týǵan kúninde árdaiym janynda bola bermegenin aityp, osy joly erekshe qýantqysy kelgenin jasyrmaǵan.
Toqtar Serikov – Beibit Seidýalievaǵa kólik syilady
2025 jyldyń maýsymynda ánshi Toqtar Serikov jubaiy Beibit Seidýalievaǵa avtokólik tartý etti.
Qýanyshty jańalyqty Beibit Seidýalieva áleýmettik jelide jariialaǵan.
Ol otbasylyq garajǵa taǵy bir kólik qosylǵanyn ázilmen aityp, syilyqqa riza bolǵanyn bildirgen. Degenmen avtokóliktiń naqty modeli men quny jariialanbaǵan.
Kenjebek Janábilov – jubaiynyń armanyn oryndady
"MýzART" tobynyń ánshisi Kenjebek Janábilov te jubaiyna jańa avtokólik syilaǵan óner ieleriniń qatarynda.
2024 jyldyń qyrkúieginde ánshi bul qýanyshyn áleýmettik jelidegi oqyrmandarymen bólisken.
Ol jaryna sý jańa kólik syilap, armandardyń oryndalatynyn aitqan. Otbasylyq qýanyshty sát kópshiliktiń jyly pikirine ie bolǵan.
Kalifarniya – "asúidiń chempionyna" syilyq
Kalifarniya laqap atymen tanylǵan ánshi Farhad Qaliev 2024 jyly jubaiyna avtokólik syilaǵan. Ol bul sheshimine Parij Olimpiadasynda jeńimpazdarǵa kólik syilaý dástúri áser etkenin ázilmen jetkizgen.
Ánshi óz jaryn "asúidiń chempiony" dep atap, oǵan kútpegen jerden sý jańa temir tulpar tartý etken. Onyń aitýynsha, jubaiy mundai tosynsyi bolatynyn aldyn ala bilmegen.
Qairat Ádilgerei – jaryna unaǵan kólikti satyp aldy
Tanymal akter ári ázilkesh Qairat Ádilgerei de jubaiy Baqyt Turmanǵa avtokólik syilaǵan.
2023 jyly óner iesi jary kópten beri armandap júrgen kólikti alyp bergen.
Olardyń aitýynsha, bul satyp alý aldyn ala josparlanǵan. Baqyt Turman jańa temir tulparynyń túsi men salonyn erekshe unatqanyn áleýmettik jelide bólisken.
Arman Janaliev – jubaiyna jańa kólik
2026 jyldyń naýryzynda ázilkesh Arman Janaliev jubaiyna qymbat avtokólik tartý etti.
Ol qýanyshty sátti beinejazbaǵa túsirip, áleýmettik jelide jariialaǵan.
Ázilkesh otbasylyq garajǵa taǵy bir kólik qosylǵanyn aityp, oqyrmandarymen qýanyshyn bólisken.
