Búginde milliondaǵan tyńdarmannyń súiispenshiligine bólengen qazaqstandyq ánshilerdiń ónerge kelý tarihy ártúrli. Biriniń talantyn bala kúninde belgili kompozitor baiqasa, endi birin tájiribeli ónerpaz qanatynyń astyna alǵan. Al keibir juldyzdyń sahnaǵa shyǵýyna kópshilik bile bermeitin jandar yqpal etken. Ult.kz tanymal bes ánshiniń ónerdegi ustazdary kim ekenin jáne olardyń shyǵarmashylyq jolyna qalai áser etkenin zerttep kórdi.
1. Meirambek Bespaev pen Altynbek Qorazbaev
Qazaq estradasynyń belgili ánshisi Meirambek Bespaevtyń ónerdegi ustazy – kompozitor Altynbek Qorazbaev. Ekeýiniń tanystyǵy Meirambektiń bala kezinen bastalǵan. Kishkentaiynan ánge jaqyn bolǵan Meirambektiń talantyn alǵash baiqaǵan jandardyń biri – Altynbek Qorazbaev. Kompozitor jas ónerpazdy qanatynyń astyna alyp, úlken sahnaǵa jol ashqan.
Meirambek Bespaev 2014 jyly "Tańsholpan" baǵdarlamasyna bergen suhbatynda ustazynyń ómirindegi ornyn erekshe atap ótken.
"Ustazym Altynbek Qorazbaevsyz menen eshteńe shyqpas edi. Ónerde baǵymnyń janǵany da sol kisiniń arqasy", – degen ánshi.
Bespaevtyń kópshilikke tanylýyna Altynbek Qorazbaevtyń "Boztorǵai" áni erekshe yqpal etti. Keiin ustaz ben shákirt birge gastrolge shyǵyp, el aralap kontsert bergen.
2. Dimash Qudaibergen men Marat Áitimov
Álemge tanylǵan ánshi Dimash Qudaibergenniń kásibi qalyptasýyna yqpal etken ustazdarynyń biri – Marat Áitimov.
Marat Áitimov Dimashqa Ahmet Jubanov atyndaǵy Aqtóbe mýzykalyq kolledjinde tórt jyl boiy vokaldan sabaq bergen. Ustaz shákirtiniń bala kezinen mýzykaǵa erekshe qabiletti bolǵanyn jáne onyń jetistikke jetýine eńbekqorlyǵy yqpal etkenin aitqan.
2019 jyly Stan.kz basylymyna bergen suhbatynda Marat Áitimov tanymal shákirti týraly estelikterimen bólisti. Onyń sózinshe, Dimash álemdik deńgeige kóterilgennen keiin de ustazymen bailanysyn úzbegen.
Al Dimashtyń ózi CNN telearnasyna bergen suhbatynda vokaldyq sheberligin jetildirýdegi eńbegi týraly aityp, Marat Áitimovke alǵysyn bildirgen.
3. Kámshat Joldybaeva men Tamara Asar
Ánshi ári aktrisa Kámshat Joldybaevanyń ónerdegi alǵashqy qadamyna Tamara Asar qoldaý kórsetkenin kópshilik bile bermeýi múmkin.
Kámshat bala kezinde Mańǵystaý oblysyndaǵy Fort-Shevchenko qalasynda turǵan. Sol kezde óńirge kontsertpen kelgen Tamara Asarmen tanysady.
"Dastarhan" baǵdarlamasynda Kámshat Joldybaeva anasynyń Tamara Asarǵa qyzynyń án aityp, bi bileitinin jetkizgenin eske alǵan. Tamara Asar da bul kezdesýdi umytpaǵan. Onyń aitýynsha, Kámshat bastapqyda kópshiliktiń aldynda án aitýǵa uialǵan. Keiin úndi tilindegi ándi oryndap, ónerpazdy tańǵaldyrǵan.
Tamara Asar jas qyzdyń qabiletin baiqap, oǵan sahnalyq kiim tiktirip, Aqtaýdaǵy baiqaýǵa daiyndaǵan. Nátijesinde Kámshat bas júldeni jeńip alǵan.
Kámshat Joldybaeva keiingi suhbattarynda Tamara Asardy ózin alǵash úlken sahnaǵa shyǵarǵan ustazy retinde atap, alǵysyn bildirgen.
4. Qairat Nurtas pen Laki Kesoglý
Qazaq estradasynyń tanymal ánshisi Qairat Nurtastyń ónerdegi ustazdarynyń biri – Qazaqstannyń halyq ártisi Laki Kesoglý. Belgili ónerpaz bul týraly Ratel.kz basylymyna bergen suhbatynda ózi aitqan.
"Máselen, Qairat Nurtas – meniń shákirtim", – degen ol.
Sondai-aq NTK telearnasy Laki Kesoglýdyń 80 jyldyq mereitoiyna arnalǵan materialynda Qairatty onyń shákirtteriniń qatarynda ataǵan. Osylaisha, tanymal ánshiniń kásibi qalyptasýynda Laki Kesoglýdyń da ustazdyq úlesi bolǵan.
Bul rette Qairattyń ónerge kelýinde otbasynyń da orny erekshe. Alaida kásibi bilim alý kezeńinde tájiribeli ánshilerdiń tálimi onyń shyǵarmashylyq qalyptasýyna yqpal etken.
5. Roza Rymbaeva men Tasqyn Oqapov
Qazaqstannyń halyq ártisi Roza Rymbaeva óziniń shyǵarmashylyq jetistikterin sóz etkende marqum joldasy, mýzykant ári dirijer Tasqyn Oqapovtyń esimin erekshe qurmetpen ataidy.
Ánshi 2021 jyly Orda.kz basylymyna bergen suhbatynda ónerge kelýine eń aldymen ata-anasynyń yqpal etkenin, al kásibi sahnadaǵy jolyn qalyptastyrýda Tasqyn Oqapovtyń eńbegi zor bolǵanyn baiandaǵan.
Roza Rymbaeva marqum joldasyn shyǵarmashylyq jetekshisi, dirijeri ári ustazy retinde sipattaǵan. Ánshiniń aitýynsha, onyń sahnadaǵy iri jetistikteri Tasqyn Oqapovtyń qoldaýymen tyǵyz bailanysty.
Osylaisha, Tasqyn Oqapov Roza Rymbaevanyń ómirlik serigi ǵana emes, kásibi qalyptasýyna airyqsha úles qosqan ónerdegi tálimgeri de bolǵan.
Ustazǵa qurmet – ónerge qurmet
Búginde bul bes ánshi qazaq ónerinde ózindik ornyn qalyptastyrǵan. Olardyń shyǵarmashylyq joldary ártúrli bolǵanymen, barlyǵyna ortaq bir erekshelik bar. Ol – ónerdegi tálimgerleriniń eńbegin baǵalaýy.
Biri ustazynyń qoldaýymen alǵash úlken sahnaǵa shyqsa, endi biri kásibi sheberligin shyńdaǵan. Bul oqiǵalar kópshilikke tanymal ónerpazdardyń jetistiginiń artynda óz eńbekterimen qatar, olarǵa jol kórsetken jandardyń da úlesi bar ekenin ańǵartady.
