Belgili kompozitor Altynbek Qorazbaev marqum akter Asanáli Áshimovpen aradaǵy syilastyǵy týraly syr shertip, kózine jas aldy.  Sondai-aq ol akterge arnap jazǵan «Jan balam» ániniń qalai dúniege kelgenin aityp berdi, dep habarlaidy ult.kz.

Kompozitordyń aitýynsha, Asanáli Áshimov ekeýiniń qarym-qatynasy áriptestikpen shektelmegen. Akter ony týǵan baýyryndai jaqyn tartyp, únemi erekshe yqylas tanytqan.

Altynbek Qorazbaev osydan 36 jyl buryn bolǵan qyzyqty oqiǵany da áńgimeledi. Sol ýaqytta kompozitor jańadan kólik satyp alǵan eken. Jambyl nómirli temir tulparyn kórgen Asanáli Áshimov ony quttyqtap, ekeýi dastarqan basynda áńgimelesken.

Alaida kompozitor erteńine ushaqpen jolǵa shyǵatynyn aitqanda, akter kútpegen áreket jasaǵan.

"Erteń ushamyn dep edim, biletimdi jyrtyp tastady da: “Erteń mashinamen baramyz”, – dedi. Solai meni erkeletetin", – dep eske aldy Altynbek Qorazbaev.

Kompozitor bul oqiǵany Asanáli Áshimovtiń ózine degen aǵalyq meiirimi men jaqyndyǵynyń bir kórinisi retinde baiandady.

Aita keteiik, Altynbek Qorazbaev nemeresine kelin izdep júrgenin aitty.

Altynbek Qorazbaev kim?

Altynbek Qorazbaev – qazaqtyń belgili kompozitory, ánshi, Qazaqstannyń halyq ártisi, Qazaqstannyń Eńbek Eri. Ol qazaq estradasy men dástúrli án óneriniń damýyna eleýli úles qosqan óner qairatkeri.

Altynbek Qorazbaev 1948 jyly 1 aqpanda Jambyl oblysynyń Merki aýdanynda dúniege kelgen. Ol ánshilik jáne kompozitorlyq shyǵarmashylyǵymen halyqqa keńinen tanyldy.

Kompozitordyń el arasynda keń taraǵan týyndylarynyń qatarynda «Qara kempir», «Qara shal», «Aiaýly Tarazym», «Saǵyndym Almatymdy», «Máńgilik mahabbat» jáne «Jan balam» ánderi bar.

Onyń shyǵarmalarynda týǵan jerge súiispenshilik, ata-anaǵa qurmet, mahabbat, adam taǵdyry men ulttyq qundylyqtar keńinen kórinis tabady.

Altynbek Qorazbaev uzaq jyldar boiy óner salasynda eńbek etip, jas ánshilerge qoldaý kórsetip keledi. Ol qazaq mýzyka ónerindegi eń tanymal kompozitorlardyń biri sanalady.