Qazaqstanǵa tanymal advokat, "Kóremiz" baǵdarlamasynyń turaqty sarapshysy Ǵabit Ómirbek dúnieden ótti. Qaiǵyly habardy belgili jýrnalist, telejúrgizýshi Rýslan Ótepbai áleýmettik jelidegi paraqshasynda jariialady, dep habarlaidy ult.kz.
Rýslan Ótepbai Instagram paraqshasynda marqummen birge atqarǵan jumystaryn eske alyp, onyń azamattyq ustanymy men adamgershilik qasietterine toqtaldy.
Jýrnalistiń aitýynsha, Ǵabit Ómirbek ómiriniń eleýli bóligin azamattardyń quqyǵyn qorǵaýǵa arnap, ádildik izdegen kóptegen adamǵa zańgerlik kómek kórsetken.
"Ádildik jolynda eńbek etken zańger ómirden ótti… Qaraly habar qabyrǵamyzdy qaiystyrdy. Belgili zańger Ǵabit Ómirbek dúnieden ótti", – dep jazdy Rýslan Ótepbai.
Telejúrgizýshi marqumnyń "Kóremiz" baǵdarlamasyndaǵy qyzmetine erekshe toqtaldy. Onyń sózinshe, zańger telejobaǵa turaqty sarapshy retinde qatysyp, kúrdeli jaǵdaiǵa tap bolǵan azamattardyń máselesin sheshýge atsalysqan. Rýslan Ótepbai Ǵabit Ómirbektiń kásibi biliktiligimen qatar, kómekke muqtaj jandarǵa janashyrlyq tanyta biletin azamat bolǵanyn atap ótti.
"Ǵabit baýyrym men júrgizgen "Kóremiz" baǵdarlamasynyń turaqty sarapshysy bolyp, talai jábirlenýshiniń quqyǵyn qorǵaýǵa, ádildik izdegen jandarǵa qol ushyn sozýǵa atsalysty. Qanshama taǵdyrǵa arasha túsip, qanshama adamnyń alǵysyn aldy. Zańger ǵana emes, adamgershiligi mol, ádildikti tý etken azamat edi", – dedi Rýslan Ótepbai.
Jýrnalist marqumnyń azamattarǵa jasaǵan jaqsylyǵy men birge atqarǵan eńbegi umytylmaitynyn jetkizdi. Ol áriptesiniń qazasyna qaiǵyryp, otbasyna jáne jaqyndaryna kóńil aitty.
"Ǵabit baýyrym, birge atqarǵan eńbegińiz ben jaqsylyǵyńyz jadymyzda máńgi saqtalady. Janyńyz jánnatta, imanyńyz joldas bolsyn! Jaqyndary men otbasyna qaiǵyra kóńil aitamyn", – dep jazdy telejúrgizýshi.
Ǵabit Ómirbek kópshilikke quqyqtyq máseleler boiynsha pikir bildirip, áleýmettik taqyryptaǵy televiziialyq talqylaýlarǵa qatysqan zańger retinde tanylǵan.
Eske sala keteiik, buǵan deiin Qyrǵyzstannyń belgili qoǵam qairatkeri, áigili jazýshy Shyńǵys Aitmatovtyń qaryndasy Roza Aitmatova 89 jasynda dúnieden ótkenin jazyp edik.
Rýslan Ótepbai kim?
Rýslan Ótepbai – qazaqstandyq belgili jýrnalist, telejúrgizýshi jáne qoǵamdaǵy áleýmettik máselelerdi kóterip júrgen media tulǵa. Ol 1991 jyly dúniege kelgen. Ál-Farabi atyndaǵy Qazaq ulttyq ýniversitetiniń jýrnalistika fakýltetin támamdaǵan. Jýrnalistika salasyndaǵy eńbek jolyn 2011 jyly bastaǵan.
Rýslan Ótepbai kópshilikke "Kóremiz" áleýmettik tok-shoýynyń júrgizýshisi retinde keńinen tanyldy. Baǵdarlamada otbasylyq janjaldar, adam quqyqtarynyń buzylýy, turmystyq zorlyq-zombylyq jáne qoǵamdaǵy ózge de ózekti máseleler kóterildi.
Jýrnalist kásibi qyzmeti barysynda KTK, "Almaty", "31 arna" jáne "Eýraziia birinshi arnasy" telearnalarynda jumys istegen. 2024 jyldyń sońynda ol tórt jyl júrgizgen "Kóremiz" jobasynan ketkenin málimdedi.
2026 jyly Rýslan Ótepbai "Anyqtaimyz. Rýslan Ótepbaimen" atty jańa televiziialyq jobamen kórermenge qaita oraldy. Sonymen qatar ol áleýmettik jelilerde belsendilik tanytyp, qoǵamdaǵy ózekti oqiǵalarǵa qatysty pikir bildirip keledi.
