TikTok arqyly qazaqstandyqtardyń 5 mln teńgege deiingi nesieleri men aiyppuldaryn esepten shyǵarýǵa ýáde beretin jalǵan jarnamalar taralyp jatyr. Jalǵan aqparatqa qarsy is-qimyl ortalyǵy mundai usynystardyń artynda fishingtik alaiaqtyq turýy múmkin ekenin eskertti, dep habarlaidy ult.kz.
Alaiaqtar memlekettik rámizderdi paidalanyp, azamattardy profildegi silteme arqyly kúmándi saitqa ótýdi usynady. Sait paidalanýshynyń baǵdarlama talaptaryna sáikes keletinin aityp, ári qarai Telegram arqyly avtorizatsiiadan ótýge baǵyttaidy.
Mamandardyń aitýynsha, bul áreket alaiaqtarǵa adamnyń akkaýntyna, jeke hattaryna jáne onymen bailanysty derekterge qol jetkizýge múmkindik berýi múmkin. Al saittaǵy keri sanaq taimeri azamattardy asyǵys sheshim qabyldaýǵa itermeleidi.
Tehnikalyq tekserý kezinde VirusTotal platformasyndaǵy LevelBlue servisi kúdikti resýrsty fishingtik sait retinde, al alphaMountain.ai men Fortinet spam retinde jiktegen. Sonymen qatar sait domeniniń tek 17 kún buryn tirkelgeni anyqtalǵan.
Ortalyq ókilderi alaiaqtar adamdardyń qarjylyq qiyndyqtaryn paidalanyp, olardyń senimine kirýge tyrysatynyn eskertedi.
Mamandardyń keńesi boiynsha, nesieni keshirý nemese aiyppuldy esepten shyǵarý týraly aqparatty tek resmi derekkózderden tekserý qajet. Qazaqstannyń memlekettik organdarynyń resmi internet-resýrstary .gov.kz domenin paidalanady. Alaida saittaǵy memlekettik rámizder men resmi logotipter onyń senimdi ekenin ózdiginen dáleldemeidi.
Eger kúmándi silteme arqyly Telegram akkaýntyna kirýge ruqsat berip qoisańyz, belsendi seanstardy tekserip, beitanys qurylǵylardy óshirip, eki kezeńdi aýtentifikatsiiany qosqan jón.
