Almaty qalasynyń Almaly aýdandyq sotynda Sanjar Boqaevtyń isi boiynsha kýágerlerden jaýap alý jalǵasyp jatyr. Jańa aiǵaqtar bir ǵana avtosherýdi uiymdastyrý úshin eki túrli kelisimshart jasaý shemasynyń is júzinde qalai jumys istegenin aiqyn kórsetedi.
2018 jyly «QazTransGaz Ónimderi» JShS-niń korporativtik damý jáne aktivterdi basqarý departamentiniń direktory qyzmetin atqarǵan Talǵat Arystanbaev is-sharany shyn máninde «We Can» kompaniiasy, onyń direktory Juldyz Artyqbaeva arqyly uiymdastyrǵanyn rastady. Kýágerdi onymen Boqaevtyń ózi tanystyrǵan.
Arystanbaevtyń aiǵaqtarynan shyǵatyn negizgi qorytyndy: ol «We Can» kompaniiasymen jumys istegen, al ekinshi «BM Trust» firmasyn múlde bilmeidi. Sondai-aq, kýáger Boqaevtyń jieni, «BM Trust» atynan ókildik etken Madiiar Qalmenovtiń avtosherýge qatysty jumys keńesterine qatysqanyn esine túsire almady. Bul aiǵaqtar memlekettik aiyptaýshynyń nusqasyn tolyq rastaidy: barlyq naqty jumysty bir merdiger atqarǵan, al ekinshi kompaniia iske tek formaldy túrde tartylǵan.
Kásipodaqtyń «BM Trust» shottaryna aýdarǵan aqshasynyń naqty qaida jumsalǵanyn taǵy bir kýáger – Aida Naryshkina túsindirdi. Ol sotta osy kompaniiaǵa «Stalex» markaly qolmen basqarylatyn valtsovka stanogyn 500 myń teńgege satqanyn rastady.
Álbette, mundai jabdyqty satyp alý avtosherýdiń jobalyq-smetalyq qujattamasyna esh qatysy joq. Bul jait prokýrordyń buǵan deiin aitqan ustanymymen tolyq sáikes keledi: tergeý nusqasy boiynsha, «BM Trust» arqyly shyǵarylǵan kásipodaq qarajatyn zańdastyrý dál osy stanoktar men Sanjar Boqaevtyń jeke jihaz biznesine arnalǵan tehnikany satyp alý arqyly júzege asyrylǵan.
