Bank qyzmetkeri retinde tanysyp, baspana men joǵary tabys ýáde etken áiel 26 epizod boiynsha kináli dep tanyldy. Alaida onyń jazasyn óteýi tórt jylǵa keiinge qaldyryldy, dep habarlaidy ult.kz.
Oral qalalyq soty azamattardy ipotekalyq nesie rásimdeýge, jeńildikpen baspana alýǵa kómektesemin jáne investitsiiadan mol tabys túsiremin dep aldaǵan áielge úkim shyǵardy. Onyń áreketinen jábirlenýshilerge 158 million teńgeden astam materialdyq zalal kelgen.
Batys Qazaqstan oblystyq sotynyń baspasóz qyzmetiniń málimetinshe, 2024–2025 jyldary sottalýshy ózin túrli bankterdiń, sonyń ishinde «Home Credit Bank» jáne «Bank TsentrKredit» qyzmetkeri retinde tanystyrǵan. Osylaisha azamattardyń senimine kirip, olardan aqsha alǵan.
Áiel ipotekalyq zaem rásimdeýge, jeńildikpen baspana satyp alýǵa járdemdesýge ýáde bergen. Sonymen qatar avtobizneske jáne óziniń jeke kásipkerligine investitsiia salǵandarǵa joǵary paiyzben paida tabatynyn aitqan.
Alǵashynda senimdi aqtap, tabysty qyzmetpen ainalysyp júrgendei kóriný úshin ol jańa qatysýshylardan túsken qarajat esebinen buryn aqsha bergenderge bastapqy somalaryn paiyzymen qaitaryp otyrǵan. Keiin iri kólemdegi aqshany iemdenip ketken. Sot isi boiynsha alaiaqtyqtyń 26 epizody anyqtaldy.
Sot otyrysynda áiel kinásin tolyq moiyndap, taǵylǵan aiyptaǵy mán-jailardy rastaǵan jáne jasaǵan isine ókinetinin bildirgen.
Sot úkimimen ol QR Qylmystyq kodeksiniń 190-baby 4-bóliginiń 2-tarmaǵy boiynsha kináli dep tanylyp, 6 jyl 8 aiǵa bas bostandyǵynan aiyryldy. Jazasyn qaýipsizdigi ortasha qylmystyq-atqarý júiesi mekemesinde óteýge tiis.
Alaida sottalǵan áieldiń 14 jasqa tolmaǵan balasy bar ekeni eskerilip, Qylmystyq kodekstiń 74-babynyń 1-bóligi negizinde jazany óteý tórt jylǵa keiinge qaldyryldy. Osyǵan bailanysty onyń kúzetpen ustaý túrindegi bultartpaý sharasy joiylyp, áiel sot zalynan bosatyldy. Onyń minez-qulqyn Oral qalalyq probatsiia qyzmeti baqylaidy.
Jábirlenýshilerdiń materialdyq shyǵyndy óndirý týraly talaptary 100 million teńgeden astam somaǵa tolyq nemese ishinara qanaǵattandyryldy. Eki jábirlenýshiniń talaptary keltirilgen zalal óz erkimen tolyq ótelgendikten qaraýsyz qaldyryldy. Al moraldyq ziiandy óteý týraly talaptar qanaǵattandyrylmady.
Ázirge úkim zańdy kúshine engen joq.
Eske sala keteiik, buǵan deiin Oralda óz kompaniiasynan 2,2 million AQSh dollaryn jymqyrǵan kásipkerdiń sottalǵany habarlanǵan edi.
