Prezident Qasym-Jomart Toqaev memlekettik basqarý júiesin túbegeili reformalap, qaǵazbastylyqty joiýdy jáne jasandy intellektini keńinen qoldanýdy tapsyrdy. Memleket basshysy memlekettik qyzmetshilerdiń kásibi deńgeiin kóterip, basqarý júiesin jańa ekonomikalyq jaǵdaiǵa beiimdeý qajettigin aitty, dep habarlaidy ult.kz.
Prezidenttiń pikirinshe, árbir memlekettik mekeme óziniń ǵana emes, tutas memlekettik apparattyń jumys isteý tártibin túsinýi kerek. Al jasandy intellekt qaitalanatyn mindetter men basqarý júiesindegi qaishylyqtardy joiýǵa kómektesýge tiis.
«Memlekettik apparat qaǵazbastylyqtan tolyq jáne birjola arylýy qajet. Sheshim qabyldaýǵa, iaǵni damýǵa kedergi keltiretin barlyq rásimdi qysqartý kerek», – dedi Qasym-Jomart Toqaev.
Memleket basshysy memlekettik qyzmetshilerdiń kásibi biliktiligine de toqtaldy. Onyń aitýynsha, memlekettik qyzmet salasynda áli de joǵary kásibi deńgeige tolyq qol jetkizildi deýge negiz joq. Osyǵan bailanysty Prezident memlekettik qyzmetshilerge arnalǵan jańa ádep qaǵidattaryn ázirleý qajettigin atap ótti.
«Memlekettik qyzmetshi, eń aldymen, Konstitýtsiia talaptaryn basshylyqqa alyp, Otanyna jáne halqyna adal qyzmet etýge tiis», – dedi Prezident.
Sonymen qatar Qasym-Jomart Toqaev memlekettik basqarý júiesindegi ózgerister jekelegen sharalarmen shektelmeýi kerek ekenin eskertti. Onyń sózinshe, elge kózboiaýshylyq emes, naqty nátijege baǵyttalǵan shynaiy reforma qajet. Bul úderis quqyqtyq jáne qarjylyq sharalardy qatar qabyldaýdy talap etedi.
Osyǵan orai, Memleket basshysy Prezident Ákimshiligine 2027 jylǵy 1 maýsymǵa deiin memlekettik basqarý júiesin reformalaýǵa qatysty keshendi jospar ázirleýdi tapsyrdy.
Prezidenttiń aitýynsha, memlekettik basqarý júiesin tsifrlyq tehnologiialar men jasandy intellektige negizdelgen jańa ekonomika talaptaryna sáikestendirip, túbegeili jańǵyrtý qajet.
