Ábilhan Qasteev atyndaǵy Qazaqstan Respýblikasynyń Ulttyq óner mýzeiinde «Jibek jolynyń sheksiz bulttary. «Bir beldeý, bir jol»: Almaty beketi» atty halyqaralyq kórme ashyldy. Kórmeni mýzei ujymy Shanhai óner kollektsiiasy mýzeiimen (SACM) birlesip uiymdastyrdy, dep habarlaidy ult.kz QR Mádeniet jáne aqparat ministrliginiń baspasóz qyzmetine silteme jasap.
Halyqaralyq joba buǵan deiin 2024 jyly Tegeranda, 2025 jyly Tashkentte tanystyrylǵan. Almaty kórmeni qabyldaǵan úshinshi qala boldy.
Foto: QR Mádeniet jáne aqparat ministrligi
Kórmege qazaqstandyq jáne qytailyq sýretshilerdiń eki eldiń mádeni dástúrleri men qazirgi beineleý óneriniń baǵyttaryn qamtityn eńbekteri qoiyldy.
Qazaqstandyq toptama Ábilhan Qasteev atyndaǵy mýzei qorynda saqtalǵan zamanaýi sýretshilerdiń týyndylarynan jasaqtalǵan. Al Qytai toptamasynan dástúrli keskindeme týyndylaryn, kóne qabyrǵa sýretteriniń naqyshtaryn jáne zamanaýi ádistermen oryndalǵan shyǵarmalardy kórýge bolady.
Foto: QR Mádeniet jáne aqparat ministrligi
Joba eki eldiń mádeni bailanysyn nyǵaitýǵa, mýzeiler arasyndaǵy áriptestikti damytýǵa jáne óner murasyn keńinen nasihattaýǵa baǵyttalǵan.
Kórmeniń Qazaqstanda ótýiniń ózindik máni de bar. «Jibek jolynyń ekonomikalyq beldeýin» qurý bastamasy alǵash ret 2013 jylǵy qyrkúiekte elimizde kóterilgen edi.
Kórme 2026 jylǵy 18 qarashaǵa deiin jalǵasady.
