Dimash Qudaibergenniń gastroldik sapar kezindegi kóńildi sáti jelide jariialandy. Latyn Amerikasyna bet alǵan ánshi ushaqta shyǵarmashylyqpen ainalysyp otyrǵan dostaryn kórsetip, ózi týraly ázil aitty, dep habarlaidy ult.kz.

Videony dombyrashylar Temirlan men Ernat áleýmettik jelidegi paraqshasynda bólisken. Qos ónerpaz uzaq saparda da ýaqytyn bos ótkizmei, kúi oryndap, shyǵarmalaryn jańasha óńdeýge kirisken. Dombyra áýenine sybyzǵynyń únin qosyp, izdenisterin jol ústinde jalǵastyrǵan.

«Gastroldik saparlar arasynda jol ústindegi ádemi sátterimizdi, erekshe kóńil kúiimizdi sizderge kórsetkimiz keledi. Keide eń qyzyqty ári umytylmas sátter dál osyndai saparlar arasynda ótedi. Aldymyzda – Latyn Amerikasy», – dep jazdy olar.

Dostarynyń jumysyn baqylap otyrǵan Dimash qolyndaǵy kesesin kórsetip: «Meniń jumysym – shai iship berý», – dep qaljyńdady. Keiin olardyń oryndaýyndaǵy kúidi tyńdap, qol soǵyp, qoshemet bildirdi.

Aita keteiik, Temirlan men Ernat buǵan deiin Dimashtyń Madridtegi kontsertinde kúi oryndap, ispan kórermenderiniń yqylasyna bólengen edi.

Aita keteiik, Túrki elderiniń basshylary Dimash Qudaibergenniń ónerine tánti boldy.

Dimash Qudaibergen kim? 
 

Dimash Qudaibergen – qazaqstandyq ánshi, kompozitor, Qazaqstannyń halyq ártisi. Tolyq aty-jóni – Dinmuhammed Qanatuly Qudaibergen. Ol 1994 jylǵy 24 mamyrda Aqtóbe qalasynda dúniege kelgen. 

Ánshiler Qanat jáne Svetlana Aitbaevtardyń otbasynda ósken Dimash bala kezinen mýzykamen ainalysqan. Aqtóbedegi Ahmet Jubanov atyndaǵy mýzykalyq kolledjde akademiialyq án oryndaý mamandyǵyn meńgerip, keiin Qazaq ulttyq óner ýniversitetinde bilim alǵan. 

2015 jyly Belarýstegi «Slavian bazary» halyqaralyq baiqaýynyń Gran-pri júldesin jeńip aldy. Al 2017 jyly Qytaidaǵy Singer án baiqaýynda ekinshi oryn ielenip, halyqaralyq aýditoriiaǵa keńinen tanyldy. Sodan beri Qytai, AQSh, Frantsiia, Ulybritaniia jáne basqa elderde jeke kontsertterin ótkizdi.