Qazaq teatr óneriniń kórnekti ókili, belgili akter Muqan Shákir 81 jasqa qaraǵan shaǵynda ómirden ozdy. Qaraly habardy Asqar Toqpan atyndaǵy teatr ujymy jetkizdi, dep habarlaidy ult.kz.
Óner ordasynyń ujymy akterdiń dúnieden ótýine bailanysty marqumnyń otbasy men jaqyndaryna kóńil aityp, onyń qazaq mádenietine sińirgen eńbegin erekshe atap ótti.
"Qazaq óneriniń abyz aqsaqaly, Qazaqstan Respýblikasynyń mádeniet qairatkeri, "Qurmet" ordeniniń iegeri, Shymkent qalasynyń Qurmetti azamaty Muqan Shákirdiń dúnieden ótýine bailanysty qaiǵyra kóńil aitamyz", – delingen teatr taratqan habarlamada.
Muqan Shákir sanaly ǵumyryn óner salasyna arnap, qazaq teatr mádenietiniń damýyna úles qosqan akterlerdiń biri boldy. Onyń shyǵarmashylyq eńbegi memleket tarapynan joǵary baǵalanyp, "Qurmet" ordenimen marapattalǵan.
Sondai-aq óner qairatkerine Shymkent qalasynyń Qurmetti azamaty ataǵy berilgen.
Akterdiń ómirden ótýi qazaq óneri úshin aýyr qaza boldy. Marqumnyń jaqyndary men ónerdegi áriptesterine qaiǵyra kóńil aitamyz.
Muqan Shákirov kim?
Muqan Shákirov – qazaq teatr óneriniń damýyna eleýli úles qosqan belgili akter, Qazaqstan Respýblikasynyń mádeniet qairatkeri. Ol 1945 jyly 14 qańtarda qazirgi Túrkistan oblysy Otyrar aýdanyna qarasty Baltakól aýylynda dúniege kelgen.
1971 jyly Qurmanǵazy atyndaǵy Almaty memlekettik konservatoriiasynyń teatr fakýltetin akter mamandyǵy boiynsha támamdaǵan. Shyǵarmashylyq jolyn Almaty oblystyq teatrynda bastap, keiin Biken Rimova atyndaǵy Taldyqorǵan drama teatrynda jáne Muhtar Áýezov atyndaǵy Qazaq memlekettik akademiialyq drama teatrynda qyzmet etken.
1981 jyly Jumat Shanin atyndaǵy qazaq drama teatryna jumysqa qabyldanyp, qyryq jyldan astam ýaqytyn osy óner ordasyna arnaǵan.
2025 jyldyń qańtarynda zeinetkerlikke shyqqan.
Qazaq mádenietine sińirgen eńbegi úshin "Qurmet" ordenimen marapattalyp, Shymkent qalasynyń Qurmetti azamaty atanǵan. Sanaly ǵumyryn sahna ónerine arnaǵan akter 2026 jyldyń qarasha aiynda dúnieden ótti.
