Qazaqstannyń halyq ártisi Naǵima Esqalieva jaqynda anasynan aiyrylǵan ánshi Sáken Maiǵazievtiń shańyraǵyna arnaiy baryp, kóńil aitty. Óner iesi dastarhan basynda ana týraly tolǵanyp, kóz jasyn tyia almady, dep habarlaidy ult.kz.
Ánshi qaraly otbasyna qoldaý bildirip, anadan aiyrylýdyń qanshalyqty aýyr ekenin aitty. Áńgime barysynda ol óziniń de anasy týraly sóz qozǵap, jasy jetpiske kelse de, áli kúnge deiin anasynyń aldynda bala bolyp qalatynyn jetkizdi.
"Áke meili ǵoi, biraq anadan aiyrylý óte qiyn. Ońai emes. Qyryqqa, elýge, alpysqa, mine jetpiske de keldim. Mamam tiri. Áli kúnge deiin urysady, áli kúnge deiin balamyz", – dedi Naǵima Esqalieva.
Osy sózderdi aitqan sátte ánshiniń kóńili bosap, janaryna jas úiirildi. Ol adamnyń jasy qanshaǵa kelse de, anasynyń meiirimi men qamqorlyǵyna muqtaj bolatynyn óz ómirinen mysal keltire otyryp jetkizdi.
Óner iesiniń shynaiy kóńil kúii jeli qoldanýshylaryn da beijai qaldyrmady. Kópshilik onyń analyq meiirim týraly aitqan sózderine tebirenip, jyly lebizderin bildirdi.
"Anańyz uzaq jasasyn", "Naǵima apai keremet adam", "Óte jaqsy kóremin bul kisini", "Bala-shaǵańyzdyń qyzyǵyn kórińiz", – dep jazdy oqyrmandar.
Jeli qoldanýshylary Naǵima Esqalievanyń Sáken Maiǵazievtiń otbasyna arnaiy baryp, qaiǵysyna ortaqtasqanyn da jyly qabyldady.
Eske sala keteiik, 13 qazanda tanymal ánshi, "MýzART" tobynyń múshesi Sáken Maiǵazievtiń anasy dúnieden ótti. Bul qaraly habar óner iesiniń jaqyndary men jankúierlerin qaiǵyǵa batyrdy.
Naǵima Esqalievanyń kóńil aitýǵa kelgen sátinde aitqan sózderi ana qadirin taǵy bir márte eske salyp, kópshiliktiń júregin tebirentti.
Naǵima Esqalieva kim?
Naǵima Qabylqyzy Esqalieva – qazaq estradasynyń belgili ánshisi, aktrisa, telejúrgizýshi, Qazaqstannyń halyq ártisi. Ol 1954 jyly 3 aqpanda Almaty oblysy Jambyl aýdanyndaǵy Fabrichnyi kentinde dúniege kelgen. Bolashaq ánshi kópbalaly otbasynda ósip, bala kezinen ónerge qyzyǵýshylyq tanytqan. Alǵashynda aktrisa bolýdy armandaǵan ol keiin ánshilik joldy tańdady.
Naǵima Esqalieva Respýblikalyq estrada-tsirk óneri stýdiiasynda belgili ánshi Laki Kesoglýdan dáris alyp, keiin Almaty mýzykalyq ýchilishesin támamdaǵan.
1977 jyldan bastap "Qazaqkontsert" birlestiginde eńbek etip, keiin áigili "Gúlder" ansambliniń quramynda óner kórsetti.
1985 jyldan bastap Almaty oblystyq filarmoniiasynyń estradalyq trýppasyna jetekshilik etti.
Ónerdegi jetistikteri úshin 1985 jyly Qazaq KSR-iniń eńbek sińirgen ártisi, al 1999 jyly Qazaqstannyń halyq ártisi ataǵyna ie boldy.
Ánshi "SuperStar KZ" jáne "X Factor" mýzykalyq jobalarynda qazylar alqasynyń múshesi bolyp, jas talanttardyń tanylýyna úles qosty. Búginde Naǵima Esqalieva qazaq estradasynyń damýyna eleýli eńbek sińirgen, birneshe býyn tyńdarmannyń yqylasyna bólengen óner ieleriniń biri sanalady.
