Belgili telejúrgizýshi Dana Nurjigit jas ulǵaiǵan saiyn ómirge degen kózqarasy ózgergenin aityp, jas kórinýge tyrysýdan bas tartqanyn jetkizdi. Ol bul týraly Ainur Asanberdige bergen suhbatynda málimdedi, dep habarlaidy ult.kz.
Telejúrgizýshiniń aitýynsha, búginde ol jasyn jasyrýǵa nemese syrt kelbetin jasartýǵa umtylmaidy. Kerisinshe, ómiriniń ár kezeńin tabiǵi qalpynda qabyldaýdy úirengen.
"Men shashyma kirgen aqpen kúresýdi qoidym. Ózimdi kilt toqtattym. Men kim úshin jas kóringim keledi? Jasymdy jasyrǵym kelmeidi", – dedi Dana Nurjigit.
Ol ýaqyt ótken saiyn adamnyń syrtqy kelbeti ǵana emes, ómirge degen kózqarasy da ózgeretinin ańǵartty. Ásirese balasynyń ósip, eseiip kele jatqany óziniń de jas ulǵaityp jatqanyn eske salatynyn aitty.
"Balamnyń eseiip kele jatqany – meniń qarttyqqa qadam basqanymnyń kórinisi", – dedi telejúrgizýshi.
Áńgime barysynda Dana Nurjigit marqum ákesin de eske aldy. Onyń aitýynsha, ákesi nebári 39 jasynda ómirden ótken. Sondyqtan telejúrgizýshi qazirgi jasyna jetýdiń ózin úlken baqyt ári Jaratqannyń syiy dep qabyldaidy.
"Bul jasqa tipti meniń ákem de jetken joq. 39 jasynda qyrshynnan úzildi. Maǵan Qudaidyń berip otyrǵan, kelip otyrǵan elýden artyq jasyna men tek razylyq aitýym kerek qoi. Sol úshin kúresýdi qoidym", – dedi ol.
Dana Nurjigittiń sózinshe, osy oilar onyń ómirlik ustanymyn ózgertken. Buryn mán bergen keibir nárselerdiń ýaqyt óte kele sonshalyqty mańyzdy emes ekenin túsingen.
"Ómirdi basqasha qyrynan kóre bastadym. Neniń mańyzdy ekenin, neniń usaq-túiek ekenin anyq túsindim", – dep túiindedi telejúrgizýshi.
Osylaisha, Dana Nurjigit jasyn jasyrýǵa tyrysqannan góri, árbir ótken jylǵa shúkirshilik etip, ómirdiń qadirin túsinýdi mańyzdy sanaitynyn jetkizdi.
